ئه‌مریكا دێ ل سەر هاریکاریێن پێشمه‌رگه‌ی یا به‌رده‌وام بیت
ئەڤرۆ نیوز ، زنار تۆڤی:
ئه‌میندارێ گشتی یێ وه‌زاره‌تا پێشمه‌رگه‌ی دیارکر: زێدەباری ناكۆكیێن د ناڤبه‌را حوکمه‌تا عیراقێ و هه‌رێما کوردستانێ دا ل سه‌ر دوسیا پێشمه‌رگه‌ی، ئه‌مریكا دێ هەر ل سه‌ر هاریكاریا پێشمه‌رگه‌ی به‌رده‌وام بیت.
جه‌بار یاوه‌ری د داخویانیه‌كێ دا بۆ ئاژانسا ئه‌نادۆل گۆتیە: ئێك ژ بابه‌ت و دۆسیێن، كو پێدڤی یه حوکمەتا نوو یا فیدرال ل سەر رێک بکەڤیت، دوسیا پێشمه‌رگه‌یه، كو ژ سالا 2004 و هەتا نوکە نه‌هاتیه چاره‌كرن.
ل دۆر پشكا هه‌رێمێ ژ هاریكاریێن ئه‌مریكا یێن بۆ سوپایێ عیراقێ دابین دكه‌ت، ئه‌میندارێ گشتی یێ وه‌زاره‌تا پێشمه‌رگه‌ی دیارکریە: هەر ژ ده‌ستپێكا شه‌رێ داعشێ، هاریكاریێن ئه‌مریكا و وه‌لاتێن دی یێن هه‌ڤپه‌یمانان ب رەنگێن جودا بەردەوام دگه‌هنه هێزێن پێشمه‌رگه‌ی، ئه‌مریكا ژی ل گۆره‌ی پلانا خوه یا سالا 2018 دیار كریه، كو دێ به‌رده‌وام ل سه‌ر هاریكاریا هێزێن پێشمه‌رگه‌ی بیت و ل ڤان نێزیكان دێ كۆنفرانسه‌كی بۆ پلانا سالا 2019 گرێده‌ن.
ئەو ژی گۆتیە: هەتا نوکە هاریكاریێن دارایی بۆ به‌شه‌كێ هێزێن پێشمه‌رگه‌ی، یێن پشكداری شه‌رێ داعشێ بووین، به‌رده‌وامن و هەیڤانە دگه‌هنه وه‌زاره‌تا پێشمه‌رگه‌ی، هەروەسا هاریكاریێن چه‌ك و ته‌قه‌مه‌نیان ژی هەتا نوکە د به‌رده‌وامن.