پارتى دساليادا 16 ئاب دا:رێگر بووين قه‌وارێ هه‌رێما كوردستانێ بهێته هه‌لوه‌شاندن
ئه‌ڤرۆنيوز:
دساليادا 16 ئاب دا، سال رۆژا دامه‌زراندنا پارتى ديموكراتى كوردستان، مه‌كته‌با سياسى يا پارتى په‌يامه‌ك به‌لاڤكر، دپشكه‌كا په‌يامێ دا هاتيه، به‌رى 72 سالان ده‌مێ نه‌ئومێدى ب سه‌ر نه‌ته‌وا كورد دا هاتى، پارتى ديموكراتى كوردستان وه‌كو چرايه‌كى هه‌لبوو تاكو تاريێ وبێ ئومێديێ لاده‌ت ودوباره وره وباوه‌ريێ دناخێ مرۆڤێ كورد دا ڤه‌ژه‌نيت.
مه‌كته‌با سياسى پارتى دياركر ژى” پارتى وه‌كو به‌رسڤدانا غه‌درا ديرۆكى يا بێ به‌هركرنا كوردان ژمافێ چاره‌نڤيس، بۆ ب دووماهى ئينانا بن ده‌ستيێ، بۆ وێ چه‌ندێ نه‌ته‌وا كورد وه‌كو نه‌ته‌وێ مه‌زن يێ چارێ ل ده‌ڤه‌رێ پێگه‌هێ شايسته يێ خوه بده‌ستڤه‌بينيت، وه‌كو پێدڤيه‌كا ديرۆكى وگوزارشت ل ئيرادا ملله‌ته‌كى هاته مه‌يدانێ كو به‌رهه‌ڤ نه‌بوو بن ده‌ستيێ وپاشكويه‌تيێ وه‌كو قه‌ده‌ر وچاره‌نڤيسه‌كێ نه‌گۆر قه‌بوول بكه‌ت”.
دياركر ” ئه‌ڤرۆ كو بيره‌وه‌ريا 72 ساليا دامه‌زراندنا پارتيا خوه دكه‌ين، پارتيا مه هه‌مان وره وباوه‌رى وبه‌رچاڤ رۆهنى، ب هه‌مان پێداگيرى ل سه‌ر پرنسيبێن نه‌گۆر يێن گه‌لێ مه وبگره زێده‌تر ژى ژ جاران، يا رژده ل سه‌ر سياسه‌ت وهه‌لويستێن خوه، رژده ل سه‌ر پاراستن وب هيزكرنا قه‌وارێ كوردستانێ كو ل پێنج سالێن بۆرى دا ب جۆره‌ها پيلان وشه‌ر پێ فرۆشتن وسه‌نگه‌ر لێگرتن دخواستن ژناڤ ببه‌ن وره‌نجا 100 سالى يا كوردان ب باى بده‌ن”.
ئاماژه دا” ل پێنج سالێن بۆرى پارتيا مه ب وره وباوه‌ريه‌كا پۆلايى روو ب روو هه‌موو وان گه‌فان بوو وخوه‌شبه‌ختانه ئێك ل دووڤ ئێك دا هاتنه شكاندن، پارتيا مه وسه‌رۆك بارزانى رێبه‌رايه‌تيا شه‌رێ به‌رگريێ ژكوردستانێ وشكاندنا داعشێ ب پيرۆزى گه‌هاند”.