ئەمریکا دێ چەکی بێی عیراقێ دەتە کوردان
ئەڤرۆ نیوز:
د دیدارەکێ دا کو رەوان نھێلی بۆ رۆژناما ئەڤرۆ بەرھەڤکریە، رێڤەبەرێ پەیوەندیێن کونگرێسی و کاروبارێن ئەکادیمی ل نوونەراتیا حوکمەتا ھەرێما کوردستانێ ل ئەمریکا بۆ ئەڤرۆ راگەھاند کو ھەتا نۆکە ٣٤ ئەندامێن کونگرێسێ ئەمریکی ل گەل ھندێ نە کو ئەمریکا چەکی بێی بەغدا بدەتە پێشمەرگەی و کوردان ژی ماف ھەبیت راستەوخوە چەکی ژ ئەمریکا بکرن، لێ ئەڤ بادەکە و ئێکلاکرنا وێ دێ کەڤیتە سالا بھێت و گۆت” کونگرێسێ ئەمریکا رازیبوو 353 ملیۆن دولاران بۆ دروستکرنا سێ لیوایێن پێشمەرگەی و پرچەککرنا وان بمەزێخیت “.
کاروان زێباری رێڤەبەرێ پەیوەندیێن کونگرێسی و کاروبارێن ئەکادیمی یا نوونەراتیا حوکمەتا ھەرێما کوردستانێ ل ئەمریکا دیارکر کو بەری چار رۆژان کونگرێسێ ئەمریکا رازیبوو کو ملیارەک و 600 ملیۆن دۆلار بۆ پرچەککرنا 12 لیوایێن عیراقێ بمەزێخیت کو سێ ژ وان لیوایان دێ بۆ پێشمەرگەی بن و ژ ڤی کوژمەی دێ 353 ملیۆن دۆلاران بۆ دروستکرن و پرچەککرنا سێ لیوایێن کوردان ھێنە مەزاختن کو ئوبامای داخوازا رازیبوونا کونگرێسی کربوو بۆ مەزاختنا ڤی پارەی.
سەبارەت پرۆژێ دانا چەکی ب ھەرێما کوردستانێ بێی کوردان کو ئەو پرۆژە ل کونگرێسی و جڤاتا نوێنەرێن ئەمریکی یە کا گەھشتە چ قۆناغ؟، کاروان زێباری دیارکر” یا ب زەحمەتە ئەڤ سالە ئەو پرۆژە دەرباز ببیت و دێ کەڤیتە سالا بھێت، ژ بەر کو جڤاتا نوێنەران ل ئەینیا بۆری دووماھی روونشتنا خوە کر و چوارشەمبیا بھێت ژی، کۆنگرێس د ئەڤ سالەدا دێ دووماھی کومبوونا خوە کەت و گۆت” مە پشتەڤانیەکا باش بۆ دەربازکرنا ڤی پرۆژەی ل کۆنگرێسی و جڤاتا نوێنەرێن ئەمریکی پەیداکرینە و نۆکە 34 کونگرێسمان ل گەل ھندێ نە کو ئەمریکا چەکی بێی بەغدا بدەتە پێشمەرگەی و کوردان ژی ماف ھەبیت راستەوخوە چەکی ژ ئەمریکا بکرن”.
سەبارەت دەرێخستنا پارتی دیموکراتی کوردستان و ئێکەتیا نیشتمانیا کوردستانی ژ لیستا تیرۆرێ و گرنگیا ڤێ بڕیارێ، کاروان زێباری گۆت” ل سالا ٢٠١١ ئەمریکا وەزارەتەک دانا ب ناڤێ وەزارەتا ئێمناھیا ناڤخوەیی و کۆنگریسی دەستوور بۆ دانایە کو 2400 بەرپەرن، و د بڕگەکێ دا ھاتیە ھەر حوکمەتەک یان گرۆپەک دژی حوکمەتا خوە یا فەرمی شەڕی بکەت، دێ چیتە د لیستا سییێ یا تیرۆرێ دا، و ژ بەر ڤێ بڕگێ گەلەک ھەڤپەیمانێن ئەمریکا ژی کەفتنە دڤێ لیستێ دا و دەمێ ل ھەیڤا چار یا سالا 2012 سەرۆک بارزانی ھاتیە ئەمریکا و باراک ئوباما دیتی، گوتێ (دڤێت پارتی و ئێکەتی د ڤێ لیستێ دا بھێنە دەر) و ئوبامای ژی ئاخڤتنا سەرۆکی پەسەندکر کو نەیا بەرئاقلە ئەڤ ھەردو حزبە د ڤێ لیستێ دا بن و دێ کار کەن کو ژێ دەربێخن، لەوما مە کار ل سەر ڤێ بادەکێ کر و مە وەکو لوبیەک ل ناڤ کونگریسی چێکر، ل سالا 2012 بادەک ل کونگریسی نەکەفتنە د بەرمانەی دا و ل سالا 2013 ژبەر چەند ئەگەران ھەر نەھاتە خوار، لێ ل رۆژا ئەینیا بۆری ل جڤاتا پیران و جڤاتا نوونەران بادەکا دەرێخستنا پارتی و ئێکەتی ھاتە خواندن و گوھۆرین د قانوونێ دا ھاتە کرن و پارتی و ئێکەتی ژ ڤێ لیستێ دەرێخستن و گرنگیا ڤێ بڕیارێ ئەوە کو بەری نوکە ھەکە ئێک ئەندامێ پارتی یان ئێکەتیێ با، دەمێ پێشکێشی ڤیزێ دکرن، ڤیزە نەددانێ و ل ئەمریکا ژی رەگەزنامە نەددانە ئەندامێن ڤان ھەردو حزبان و ئالۆزی بۆ پەیدادکرن، بەلێ ژ ئەڤرۆ پێدا چو ئالۆزی پەیدا نابن.
