ساخله‌مى: ل رۆژانێن جه‌ژنێ 513 زارۆ ژ دايك بووينه و 32 كه‌سان گيانێ خوه ژ ده‌ست دايه.
ئه‌ڤرۆ نيوز:
رێڤه‌به‌ريا ساخله‌ميا پارێزگه‌ها دهۆكێ د كۆنگره‌كێ رۆژنامه‌ڤانى دا ئامارێن رۆژانێن جه‌ژنێ ل پارێزگه‌ها دهۆكێ راگه‌هاندن و دا زانين كو ل رۆژانێن جه‌ژنێ 513 زارۆ ژ دايك بووينه و 32 كه‌سان گيانێ خوه ژ ده‌ست دايه.
حه‌مزه ره‌زيكى، به‌رپرسێ راگه‌هاندنا رێڤه‌به‌ريا گشتى يا ساخله‌ميا پارێزگه‌ها دهۆكێ د كۆنگره‌كێ رۆژنامه‌ڤانى دا راگه‌هاند كو د رۆژانێن جه‌ژنێ دا 13 هزار و 182 كه‌سان سه‌ره‌دانا بنگه‌هێن ساخله‌ميێ و نه‌خۆشخانان كريه و ژ وان ژى 396 كه‌س ل ده‌زگه‌هێن ساخله‌ميێ هاتينه نڤاندن.
حه‌مزه ره‌زيكى گۆت: “هه‌ر د رۆژانێن جه‌ژنێ دا، سه‌ره‌رايى بهێنڤه‌دانێ ژى به‌لێ 74 نشته‌رگه‌ريێن جودا بۆ نه‌خۆشخان ل نه‌خۆشخانێن سه‌ر ب رێڤه‌به‌ريا گشتى يا ساخله‌ميا پارێزگه‌ها دهۆكێ ڤه هاتينه ئه‌نجام دان.
دا زانين ژى كو ل رۆژانێن جه‌ژنێ 513 زارۆ ژ دايكبووينه؛ 222 كچ و 281 كوڕ بووينه و گۆت: “د رۆژانێن جه‌ژنێ دا 32 كه‌سان ل پارێزگه‌ها دهۆكێ ب روودانێن جودا و مرنێ گيانێ خوه ژ ده‌ست دايه”.
ده‌رباره‌يى روودانێن رۆژا جه‌ژنێ ژى ئاشكه‌را كر كو 32 روودانێن ترۆمبێلان هه‌بووينه كو بووينه ئه‌گه‌رێ مرنا سێ كه‌سان و سێ حاله‌تێن خه‌ندقينێ ژى هه‌بووينه ل گه‌ل 28 حاله‌تێن سۆتنێ كو دو ژ وان هاتينه نڤاندن و رێژا سۆتنا وان ژ 20 بۆ 35%ێ بوويه.
هه‌ر ل دۆر روودانان دا زانين ژى كو حاله‌ته‌كێ بزاڤا خوه كوشتنێ هه‌بوويه و 21 حاله‌تێن ب شه‌رچوونێ ژى هاتينه تۆماركرن و ژ ئه‌گه‌رێ گوله‌يێن ئاگرى ژى دو كه‌س بريندار بووينه و 391 كه‌س ژى ژه‌هراوى بووينه ب ره‌نگه‌كێ گشتى ئه‌ڤ كه‌سێن گيانێ خوه ژ ده‌ست داين، شه‌ش زارۆ بوون و شه‌ش كه‌سان ژى ب روودانان و 9 كه‌سان ژى ل پشكێن ته‌نگاڤيان، 11 كه‌سان ژى ژ ئه‌گه‌رێ نه‌خۆشيێن دومدرێژ كو دبنه 31 كه‌س.
ده‌رباره‌يى خزمه‌تێن ساخله‌ميێ ژى راگه‌هاند كو 140 كه‌سان په‌يوه‌ندى ب تيمێن 122 كرينه و 48 ژێ هاتينه ڤه‌گوهاستن بۆ ده‌زگه‌هێن ساخله‌ميێ كو شه‌ش ژ وان حاله‌تێن زارۆبوونێ بوون.
ل ناوه‌ران و باشيك تيمێن ساخله‌ميێ 302 نه‌خۆش چاره‌كرينه و 82 نه‌خۆش بۆ ده‌زگه‌هێن ساخله‌ميێ ڤه‌گوهاستينه هه‌ر وه‌كو حه‌مزه ره‌زيكى گۆتى.
ل دووماهيێ ژى به‌رپرسێ راگه‌هاندنا رێڤه‌به‌ريا گشتى يا ساخله‌ميا پارێزگه‌ها دهۆكێ نه‌ڤه‌شارت كو زێره‌ڤانيا ساخله‌ميێ 129 سه‌ره‌دان بۆ جهان كرينه و حه‌فت هوشدارى داينه و 10 جهـ ژى ب كۆژمێن پاره‌يى سزا داينه.
