ھەلبژارتن پرسەکا نافخۆیە و دڤێت ددەمێ خوەدا بھێتە کرن
ئه‌ڤرۆ نيوز:
بڕیارە دووماھیا ھەیڤا ئیلوونا داھاتی ھەلبژارتنا پەرلەمانێ کوردستانێ بھێتە ئەنجامدان و بەرپرسەکێ کورد ژی دبێژیت، ھەلبژارتن پرسەکا نافخۆیە و دبیت ددەمێ خوەدا برێڤەبچیت، ھەروەسا دیارکر نەخشێ سیاسیێ ھەرێما کوردستانێ پێدڤی ب گۆھۆڕینێ ھەیە ھەتا حوکمەتا بھێز بھێتە ئاڤاکرن و شەرعیەتێ ل مللەتی وەربگریت.
باپیر کامەلا سکرتێرێ حزبا کرێکار و رەنجدەرێن کوردستانێ بۆ رۆژناما ئەڤرۆ گۆت: ھەلبژارتن پرسەکا نافخۆیا ھەرێما کوردستانێ یە ئەم دێ ھەلبژارتنان بۆ خوە کەین نەک بۆ خەلکێ بیانی لەوڕا پێدڤیە ھەلبژارتنێن پەرلەمانێ کوردستانێ ددەمێ خوە یێ دیاری کری بھێنە رێڤەبرن ، چونکە نەک دەمێ ھەلبژارتنان ھاتیە، بەلکۆ سالەک ژی ل سەر ژڤانێ قانوونیێ ھەلبژارتنان دەربازبویە و خەلکی بۆ دەمێ چوار سالان باوەری ب حوکمەت و پەرلەمانێ نوکە داینە نەک بۆ زێدەتر، دبیت ھەیڤا یازدە یا سالا بۆری ئەڤ ھەلبژارتنە ھاتبانە ئەنجامدان، بەلێ ب ھەر حال ژبەر کاودانێن ھەرێم تێدا دەربازبوی بۆ دەمێ دو خۆلان تەمەنێ پەرلەمانی ھاتە درێژکرن، ئەڤرۆ ئەم یێ دبینین ل ھەلبژارتنێن بۆری ھەتا نوکە چەندین روویدانێن گرنگ چێبووینە و کوردستان ژبەر روویدانێن 16ی ئۆکتۆبەرێ و قەیرانا ئابووری و شەڕێ داعش چوویە قۆناغەکادی دا، لەوڕاژی پێدڤی ب پێداچوونێ ھەیە رەوشا ھەرێما کوردستانێ و دڤێت نەخشێ سیاسیێ ھەرێمێ بھێتە گۆھۆڕین، ھەتا ئەم بشێین خوە ژبۆی قۆناغا داھاتیا عیراقێ بەرھەڤ بکەین و ھەگەر ھەلبژارتن ددەمێ خوەدا نەھێنە رێڤەبەرن ئەڤە دێ پڕۆسا سیاسی و دیموکراسی ل ھەرێما کوردستانێ کەڤیتە بن نیشانێ پرسیارێ.
باپیر کامەلا گۆت: باشترین چارەسەر بۆ دووماھی ئینان ب ئاریشە و ناکۆکیێن سیاسیێن ھەرێما کوردستانێ ئەنجامدانا ھەلبژارتنانە لڕۆژا 30 ئیلوونا داھاتی، چونکە پشتی ھەلبژارتنان دێ حوکمەتەکا نوو ل ھەرێما کوردستانێ ھێتە پێکئینان و دێ دوماھیی ب زۆر پرسێن گرنگ ھێت، ئەف لایەنێ بخوازیت دێ پشکداریێ کەت و یێ بخوازیت ببیتە ئۆپۆزسیۆن ئەڤە دێ رێیا خوە ھەلبژێریت، ئەگەر مە بڤێت حوکمەتەکا بھێز ل ھەرێما کوردستانێ ھەبیت، ئەڤە چو گۆمان تێدا نینە دڤێت ژلایێ جەماوەری ڤە بھێتە ھەلبژارتن، ئەف حوکمەتا نوکەی ھەی دەمێ ڤێ یێ بەرەف دوماھیێ دچیت.
