نوشدارێ شێخ ئه‌حمه‌د بۆ ئه‌ڤرۆ نيوز به‌حس ل ره‌وشا وى دكه‌ت
ئه‌ڤرۆ نيوز، نيوار محه‌مه‌د سه‌ليم:
دكتور ره‌زڤان محه‌مه‌د باله‌ته‌يى، تايبه‌تمه‌ندێ نشته‌رگه‌ريێن مێشك و ده‌ماران ل دهۆكێ بۆ ئه‌ڤرۆ نيوز به‌حس ل نشته‌رگه‌ريا فه‌رماندێ هێزا دژى تيرۆرێ ل دهۆكێ كر و دا زانيين نوكه ره‌وشا وى باشه نشته‌رگه‌ريى بۆ ب سه‌ركه‌فتيانه يا هاتيه كرن و دێ ئه‌ڤرۆ به‌ر ب ژ ده‌رڤه‌يى وه‌لاتى به‌ن.
دكتور ره‌زڤان محه‌مه‌د باله‌ته‌يى گۆت: “دوهى ده‌مژمێر چارى ئێڤارى ئينا پێشوازيێ ل نه‌خۆشخانا ته‌نگاڤيان ل دهۆكێ و چو بهێن نه‌بوو و ره‌وشا وى گه‌له‌ك يا خراب بوو، چو كاردانه‌ڤه‌ك نه‌بوو، لێدانا دلى نه‌بوو و په‌ستان ژى نه‌دهاته زانين و چاڤێن وى ژى د گرتى بوون، پشتى پشكنين بۆ هاتينه كرن و هنده‌ك ده‌رمان وه‌رگرتين لێدانێن دلى و په‌ستانا وى ڤه‌گه‌ريا ڤه و پاشان ژى تيشكا مێشكى بۆ هاته گرتن و ديار بوو برينداريا وى زێده‌تر ل لايێ چه‌پێ يێ مێشكى بوو، ره‌ش و شين ببوو و كۆمبوونه‌كا خوينێ چێبوو و ساجمه‌ك و پرته‌كا هه‌ستى چوو بوو ناڤ مێشكى”.
زێده‌تر گۆت: “پشتى مه نشته‌ر گه‌رى بۆ ئه‌نجام دايى ئه‌و كۆمبوونا خوينێ راكرى و ئه‌و هه‌ستى و ساجمه ئيناينه ده‌رێ هوشيار بوونا وى باشتر لێ هات و ئه‌ڤرۆ سپێدێ گه‌له‌ك باشتر بوو و بۆ باشيێ دچيت و به‌رده‌وام ره‌وشا وى به‌ر ب باشتر دچيت”.
تايبه‌تمه‌ندێ نشته‌رگه‌ريێن مێشك و ده‌ماران ل دهۆكێ خۆياكر كو بڕيار بوو دوهى به‌ر ب ژ ده‌رڤه‌يى وه‌لاتى ببه‌ن ب تايبه‌ت كو حه‌زا خێزانا وى بوو، به‌لێ ل سه‌ر داخوازى و شيره‌تا رێڤه‌به‌رێ گشتيێ ساخله‌ميا پارێزگه‌ها دهۆكێ بڕيار هاته دان نشته‌رگه‌رى بۆ بهێته كرن و پاشان به‌ر ب ژ ده‌رڤه‌يى وه‌لاتى ببه‌ن و گۆت: “ئه‌و د به‌رژه‌وه‌نديا وى دا بوو”.
نه‌ڤه‌شارت ژى كو هێشتا ئه‌و جهێ دێ بۆ هێته ڤه‌گوهاستن نه‌هاتيه دياركرن، به‌لێ گۆت: “ئه‌ز دێ هه‌تا دووماهيێ ل گه‌ل بم”.
ل دۆر كارتكێكرنا ژ ده‌ستدانا رێژه‌كا له‌شێ وى ژى گۆت: “برينا وى گه‌له‌ك يا گران بوو، هێشتا نه‌بوويه 24 ده‌مژمێر بزانين چاوايه، به‌لێ چێبوونه‌ڤا وى گه‌له‌ك يا باشه و به‌ختێ چێبوونێ ل ده‌ف گه‌له‌ك يێ باشه و له‌شێ وى ژى يێ ساخله‌مه”.
دوهى ژ ئه‌نجامێ ته‌قينا ترۆمبێله‌كا مينرێژكرى ل به‌ره‌يێ شه‌رێ، فه‌رماندێ هێزا دژى تيرۆرێ يا پارێزگه‌ها دهۆكێ، شێخ ئه‌حمه‌د گه‌لى رۆمانى، ب گرانى بريندار بوو و بۆ نه‌خۆشخانا ته‌نگاڤيان ل دهۆكێ هاتبوو ڤه‌گوهاستن.
