ڤيديۆ: بارزانى كۆنگره‌كێ رۆژنامه‌ڤانى ل چيايێ شنگال گێرا
ئه‌ڤرۆ نيوز:
سه‌رۆكێ هه‌رێما كوردستانێ، مه‌سعود بازرانى، د كۆنگره‌كێ رۆژنامه‌ڤانى دا ل سه‌رێ چيايێ شنگال ئاماژه ب وێ چه‌ندێ كر كو ئه‌و دێ ده‌سپێكێ ده‌ڤه‌رێن كوردستانى رزگار كه‌ن و پاشان هندى د شيانێن وان دا بيت دێ ل داعش ده‌ن، ئاماژه دا هندێ ژى كو پێشمه‌رگه‌يى د 48 ده‌مژمێران دا 48 هزار كيلۆمه‌تر ئازاد كرينه.
سه‌رۆكێ هه‌رێما كوردستانێ و فه‌رماندێ هێزێن چه‌كدار، مه‌سعود بارزانى، به‌رى ده‌مه‌كێ كێم د كۆنگره‌كێ رۆژنامه‌ڤانى دا ل سه‌رێ چيايێ شنگالێ په‌يڤه‌ك پێشكێشكر و گۆت: “ب خۆشحاليه‌كا ئێكجار زۆر بۆ گه‌له‌كێ كوردستانێ رادگه‌هينم و پيرۆزباهيه‌كا گه‌رم ل خووشك و برايێن ئێزدى دكه‌م يێن كو ل ڤێره گه‌له‌ك ئاسته‌نگ ديتين”.
زێده‌تر گۆت: “سۆپاسيا پێشمه‌رگه‌يى دكه‌م كو رێيا ره‌بيعه شنگار و ره‌بيعه زۆمار كۆنترۆلكرى، داستانه‌كا مێژوويى بوو تۆماركرى”
سه‌رۆكێ هه‌رێمێ سوپاسيا خودێ ژى كر و گۆت: “ئێك ژ هيڤيێن من يێن كو ل سه‌ر چيايێ شنگال پيرۆزباهيا سه‌ركه‌فتنێ ل گه‌لێ شنگالێ بكه‌م وسه‌ركه‌فتنا پێشمه‌رگه‌يى پيرۆز كه‌م هاته پێش”.
ئه‌و ئێك ژى نه‌ڤه‌شارت كو باژێرێ شنگال ب خوه ژى د ناڤ به‌رنامێ وان دا نه‌بوويه و گۆت: ” ئه‌و ژى گه‌له‌ك يێ هاتيه كونترۆلكرن”.
ل دۆر پرسيارێن رۆژنامه‌ڤانان ژى ئاماژه ب وێ چه‌ندێ كر كو هه‌ر جهه‌كێ ده‌ستێ وان ب گه‌هيتێ دێ ژ ده‌ستێن وان ئينينه ده‌ر و گۆت: “ئه‌ڤه دێ حالێ هه‌ر كه‌سه‌كى بيت كو هزر ل هندێ بكه‌ت ته‌عدايێ ل ملله‌تێ مه بكه‌ت”.
ده‌باره‌يى پشته‌ڤانيكرنا هێزێن عيراقى بۆ رزگاركرنا مووسل ژى گۆت: “هه‌كه حوكمه‌تا هه‌رێمێ به‌رنامه هه‌بيت دێ هاريكاريا وان كه‌ين و دێ ب گۆره‌يى به‌رنامه‌يى هاريكاريا وان كه‌ين و هه‌ر جهێ داعش لێ هه‌بيت دێ بزاڤا ژ ناڤبرنا وان كه‌ين، به‌لێ ب گۆره‌يى شيانان”.
نه‌ڤه‌شارت ژى كو ئه‌ڤه نه دووماهيا داعشه، به‌رنامێ وان ئه‌وه ده‌ڤه‌رێن خوه رزگار كه‌ن و هه‌ر جهێ د شيانێن وان دا بيت دێ ل داعش ده‌ن.
ل دۆر قه‌ره‌بووكرنا خه‌لكى ژى گۆت: “حوكمه‌تا هه‌رێما و فيدرال پێدڤيه ئه‌ڤ خه‌لكه بهێته قه‌ره‌بووكرن، به‌لێ ب نسبه‌تا من دڤێت ده‌سپێكێ قه‌ره‌بوويا ده‌روونى بهێته كرن و پاشان ژى يا پاره‌يى يا ب ساناهى يه”.
