ستراتیژیا ترامپی ل ھەمبەر ئیرانێ دیار نینە و دڤێت کورد د ھشیار بن
ئه‌ڤرۆ نيوز:
مامۆستایەکێ زانکۆیێ ل رۆژھەلاتێ کوردستانێ دیار دکەت کو ترامپ ناخوازیت رژێما مەلایان ل ئیرانێ بھێتە گوھۆڕین، بەلکو ئەو دخوازیت ب رێیا ھندەک رێککەڤتنان ئیرانێ نەچار بکەت داخوازیێن ئەمریکا ئانکۆ وان ١٢ خالێن بەری نھا قەبوول بکەت، ژ بەر ھندێ ژی دڤێت کورد ل رۆژھەلات ھشیار بن و خوە نەکەنە قوربانی.
د. شەھریار رۆژھەلاتی مامۆستایێ زانکۆیێ ل رۆژھەلاتێ کوردستانێ بۆ رۆژناما ئەڤرۆ دیار کر کو ھەتا نھا ژی ستراتیژیا ترامپی ل ھەمبەر ئیرانێ دیار نینە، سزایێن ئابووری ل سەر ئیرانێ ھاتینە سەپاندن لێ د ھەمان دەمی دا ترامپ بەرھەڤە ل گەل رۆحانی و سەرکردێن ئیرانێ کۆم ببیت و ئارمانجا سەرەکی یا ترامپی ژی ئەوە کو ئیران داخوازیێن ئەمریکا قەبوول بکەت و گۆت: (بەری نھا ئەمریکا ١٢ خال وەکو داخوازیێن خوە پێشکێشی ئیرانێ کربوون و نھا ژی ترامپ دبێژیت ئەو دخوازن رێککەڤتنەکا نوو ل گەل ئیرانێ ئیمزا بکەن، ئانکۆ دیار دبیت گوھۆڕینا رژێما ئیرانێ د ستراتیژیا ئەمریکا دا نینە و بابەت بەرژەوەندیێن ئابووری و سیاسی نە، ژ بەر ھندێ ژی دڤێت کورد ل رۆژھەلاتێ کوردستانێ ھشیار بن و خوە نەکەنە پشکەک ژ پیلانێن ئەمریکا، چونکو دیارە د بەرنامێ ئەمریکا دا چو تشتەک بۆ کوردان نینە و ژ بەر ھندێ ژی دڤێت کورد ھشیار بن و سیاسەتەکا سەربخوە ژ بۆ بەرژەوەندیێن نەتەوی برێڤە ببەن).
ناڤبری د پشکەکا دی یا ئاخڤتنا خوە دا دیار کر کو ئەمریکا ب تایبەتی ژی ترامپ دخوازیت رێککەڤتنەکا وەکو یا کۆریا باکور ل گەل ئیرانێ ئیمزا بکەت دا ئیرانێ نەچار بکەت دەستان ژ دروستکرنا چەکێن ئەتۆمی بەردەت و رێ بدەت ئەمریکا ل ئیرانێ سەرمایەگوزاریان بکەت، ئانکۆ دخوازیت ب رەنگەکێ دی ئیرانێ لاواز بکەت، لێ نھا د بەرنامێ وان دا گوھۆڕینا رژێما ئیرانێ نینە، ئەو یەک ژی بۆ کوردێن رۆژھەلات باش نینە و گۆت: (مخابن بابەتێ مافێن کوردان ل رۆژھەلاتا ناڤین و ب تایبەتی ژی ل ئیرانێ د خەما ئەمریکا دا نینە، بەری نھا مە ھەلویستێ وان ل ھەمبەر ریفراندۆما ھەرێما کوردستانێ ژی دیت، ژ بەر ھندێ ئەز ھێڤیدارم سەرکردێن رۆژھەلاتێ کوردستانێ پشتا خوە ب ئەمریکا گەرم نەکەن، بەرۆڤاژی ڤێ یەکێ کار بکەن ئێکەتیا خوە دروست بکەن و پتر خوە نێزیکی خەلکی بکەن).
مامۆستایێ زانکۆیێ د دووماھیا ئاخڤتنا خوە دا ئەو یەک ژی دیار کر کو سالەک ل سەر ریفراندۆما ھەرێما کوردستانێ دەرباز بوو، ئەز ئێک ژ وان کەسان بووم کو من ژ دل و جان پشتەڤانی ل ریفراندۆمێ کر و نھا ژی شانازیێ ب ریفراندۆمێ و ئەنجامێ وێ دکەم، بێگومان خیانەتا ناڤخوەیی ل کەرکووکێ نەھێلا ئەم بگەھینە ئارمانجا خوە یا پیرۆز، لێ وەکو سەرۆک بارزانی ژی بەری نھا گۆتی ئەم ب چو رەنگەکێ دەستان ژ مافێ سەرخوەبوونێ بەرنادەین.
