سالح موسلم چ به‌حس ل پێشمه‌رگه‌يى دكه‌ت
ئه‌ڤرۆ نيوز:
هه‌ڤسه‌رۆكێ په‌يه‌دێ رۆلێ هێزێن پێشمه‌رگێ كوردستانێ بلند د هه‌لسه‌نگينيت كو مل ب ملێ هێزێن يه‌په‌گێ و هه‌موو هێزێن كورد د به‌ره‌ڤانيكرنا باژێرێ كۆبانێ و ده‌ڤه‌رێن بن ده‌ستێن كوردستانێ شه‌رى دكه‌ت و دبێژيت: “پێشمه‌رگه بۆ گه‌لێ كورد سه‌لماند هێزێن ئێك پارچا كوردستانێ نينن، به‌لكو هێزێن هه‌موو كوردستانێ نه”.
رۆژا 21\12\2014 سالح موسلم هه‌ڤسه‌رۆكێ په‌يه‌دێ سميناره‌ك ل باژێرێ يۆتۆبۆرى ل وه‌لاتێ سويد رێكخست كو هژماره‌كا زۆر ژ ره‌ڤه‌ندا كورد و سياسه‌تمه‌دار و ره‌وشه‌نبير تێدا ئاماده ببوون.
سمينار ب گشتى ل سه‌ر كاودانێن كوردستانێ و ب تايبه‌ت رۆژئاڤايێ كوردستانێ بوو، كو تێدا هه‌ڤسه‌رۆكێ په‌يه‌دێ به‌خودانا گه‌له‌كێ كورد و ئێكه‌تيا گه‌لێ كوردستانێ وه‌كو چه‌مكه‌كێ سه‌ره‌كى يێ بابه‌تى به‌حس كر.
ديسا به‌حس ل كۆنگرێ نه‌ته‌وى يێ گه‌لێ كورد كر و ئاماژه ب وێ په‌يوه‌نديێن گشتى يێ كوردان كر كا نوكه د چ ئاست دانه و رۆهنژى كر كو ب ڤێ دووماهيێ په‌يوه‌نديێن دبلۆماسى يێن كوردان ل گه‌ل جيهانێ به‌ر ب پێش چووينه.
د درێژاهيا بابه‌تى دا، هه‌ڤسه‌رۆكێ په‌يه‌دێ ته‌كست خسته سه‌ر په‌يوه‌نديێن رۆژئاڤا ل گه‌ل كوردێن باكور و باشوور، د ڤێ ده‌ربارێ دا رۆلێ هێزێن پێشمه‌رگێ كوردستانێ بلند نرخاند كو هه‌ڤده‌م مل ب ملێ هێزێن يه‌په‌گێ و هه‌موو كوردان به‌ره‌ڤانيێ ژ باژێرێ كۆبانێ و ده‌ڤه‌رێن بن ده‌ستێن كوردستانێ دكه‌ن دژى چه‌كدارێن داعش.
هه‌ر د ڤێ سمينارێ دا، هه‌ڤسه‌رۆكێ په‌يه‌دێ راگه‌هاند، هێزێن پێشمه‌رگێ كوردستانێ بۆ گه‌له‌ك كورد سه‌لماند كو هێزێن ئێك پارچا كوردستانێ ب تنێ نينن، به‌لكو هێزێن هه‌موو گه‌لى نه، ديسا به‌رخودانێن پێشمه‌رگه‌يى و په‌يه‌دێ و گه‌ريلا و شه‌رڤانان بۆ رزگاركرنا كۆبانێ شاهدێن حاشا نه‌كرى نه.
