به‌ربرسه‌كێ پارتى: حەشدا شەعبی تیرۆریستێن داعشێ دكه‌تە چەكدارێن خوه
ئه‌ڤرۆنيوز:
به‌پرسێ لقێ 15 يێ پارتى ديموكراتى كوردستان راگه‌هاند، حه‌شدا شه‌عبى ل سنورێ خانه‌قين ده‌ست ب ڤه‌گه‌راندنا داعشان كريه ودكه‌ته چه‌كدارێن خوه، ئه‌وژى دچنه سه‌ر گوندان وده‌ست ب سه‌ر ئه‌ردێ كوردان دا دگرن.
شێخ جەعفەر شێخ مستەفا، بەرپرسێ لقێ 15 يا پارتی دیموكراتی كوردستان ل خانەقین گۆت “پشكه‌كا عه‌ره‌بان ل سنورێ خانه‌قين ل ده‌مێ خوه كه‌ڤنه به‌عسى بوون وپاشى چوونه ناڤ رێكخراوا قاعيده وپشتى هاتنا داعشێ ژى ده‌ست ل گه‌ل وان تێكهه‌ل كر وبوونه چه‌كدارێن وان، ئه‌ڤه ژى هه‌موو بۆ وێ چه‌ندێ دا دژايه‌تيا كوردان بكه‌ن وشه‌ر ل گه‌ل پێشمه‌رگه‌ى دكر وپێشمه‌رگه‌ك ژى شه‌هيد كريه، پشتى وێ چه‌ندێ كو پێشمه‌رگه‌ى ده‌ڤه‌ر رزگاركرى، ئه‌و ره‌ڤين، به‌لێ ده‌مه‌كه حه‌شدا شه‌عبى ل دژى كوردان رێككه‌فتن ل گه‌ل وان كريه وڤه‌دگه‌رينيت بۆ ده‌ڤه‌رێ ووان دكه‌نه چه‌كدار دناڤ رێزێن خوه دا، ئه‌و ژى دچنه سه‌ر گوندان ل سنورێ شێخ باوه وده‌ست ب سه‌ر ئه‌ردێ كوردان دا دگرن”.
شێخ مسته‌فا زێده‌تر بۆ مالپه‌رێ فه‌رمى يێ پارتى ديموكراتى كوردستان گۆت” ئه‌و ل ده‌مێ خوه ل قه‌ره‌بوويا وان ئه‌ردان هه‌ر ئێك ژوان 20 مليۆن دينار ژى وه‌رگرتينه، به‌لێ نوكه ب پشته‌ڤانيا حه‌شدا شه‌عبى دخوازن ب زۆرى ئه‌ردێن كوردان داگير بكه‌ن، له‌وما مه ژى سه‌ركردايه‌تيا پارتى ل دۆر وێ چه‌ندێ ئاگه‌هدار كريه”.
به‌رپرسێ لقێ 15 يێ پارتى به‌حسێ وێ چه‌ندێ ژى كر كو ل ده‌مێ بۆرى هژماره‌كا خێزانان ڤه‌گه‌رياينه وتنێ ل سێ رۆژێن بۆرى 20 خێزانێن دى يێن داعشان هاتينه ڤه‌گه‌راندن بۆ جه‌له‌ولا كو نوكه يێن دخانيێن گرێ دا، چونكى وان چو جه نينن تێدا ئاكنجى بن ودخوازن كێشان بۆ وه‌لاتيێن كورد دروست بكه‌ن.