سەرکردەکێ PDK ئیران بۆ ئەڤرۆ: ژ بەر سزایێن ئەمریکا دێ رۆلێ ئیرانێ ل رۆژھەلاتا ناڤین لاواز بیت
ئه‌ڤرۆ نيوز:
سەرکردەکێ پارتی دیموکراتی کوردستان/ ئیران دیار دکەت کو ئێک ژ ئارمانجێن سەرەکی یێن ئەمریکا ئەڤە کو رۆلێ ئیرانێ ل دەڤەرێ لاواز کەت و ھەکە سزایێن گران ل سەر ئیرانێ بھێنە سەپاندن دێ رژێم تەنگاڤ بیت و دێ نەچار بیت ھەموو ھێزێن خوە ل سووریێ، عیراقێ و لوبنانێ ڤەکێشیت، لێ ئەز دوور ژی نابینم کو ھەموو داخوازیێن ئەمریکا قەبوول بکەت و تەسلم بیت.
رۆستەم جیھانگیری ئەندامێ سەرکردایەتیا پارتی دیموکراتی کوردستان/ ئیران د دیدارەکێ دا ل گەل رۆژناما ئەڤرۆ بەحسێ کارگەریا سزایێن ئەمریکا ل سەر ئیرانێ کر و راگەھاند کو سزایێن ئەڤرۆ دێ ل سەر ئیرانێ ھێنە سەپاندن سزایێن گرانن و ئەمریکا دخوازیت ب ڤان سزایان رژێما نھا یا مەلایێن ئیرانێ گەلەکێ تەنگاڤ کەت و گۆت: (بەری ھەر تشتەکێ ترامپ دخوازیت رێگریێ ل بەرنامێ ئەتۆمی یێ ئیرانێ بکەت و یا دی ژی دخوازیت رۆلێ ئیرانێ ل رۆژھەلاتا ناڤین لاواز کەت، ئەمریکا دخوازیت ب سزادانێ ئیرانێ نەچار بکەت دا ھێزێن خوە ژ سووریێ، عیراقێ، لوبنانێ و یەمەنێ ڤەکێشیت و ئەز ب باوەرم ھەکە سزا وەکو پێدڤی لسەر ئیرانێ بھێنە سەپاندن دێ رژێما تەھرانێ نەچار بیت ھەموو داخوازیێن ئەمریکا ژی قەبوول کەت دا ژناڤ نەچیت).
ئەندامێ سەرکردایەتیا پارتی دیموکراتی کوردستان/ ئیران ئەو یەک ژی دیار کر کو ھەکە سزایێن ئەمریکا وەکو پێدڤی نەبن و کارتێکرنەکا مەزن نەکەت وی دەمی رەنگە ئیران پتر ئالۆزیان ل رۆژھەلاتا ناڤین دروست بکەت، ژ بەر ھندێ ژی دڤێت ژ بلی سزایێن ئابووری د بیاڤێن مافێ مرۆڤی دا ژی ئیران بھێتە سزادان، چونکو رژێما نھا یا ئیرانێ مافێ مرۆڤی بنپێ دکەت و رۆژانە خەلکی ل سێدارە ددەت و گۆت: (کاریگەریا سزایێن ئابووری یێن ئەمریکا ل سەر ئیرانێ دشێت دەلیڤەکا دی یا خەباتێ بۆ گەلێن ئیرانێ دروست کەت).
د دووماھیا ئاخڤتنا خوە دا ژی ناڤھاتی راگەھاند کو کوردێن رۆژھەلات ب سالانە ل دژی دەستھەلاتا مەلایان خەباتێ دکەن و ھەکە ئەمریکا د سزادانا ئیرانێ دا جدی بیت و ئارمانجا ترامپی گوھۆرینا رژێما ئیرانێ بیت ئەز ب باوەرم دێ کورد و نەتەوێن دی یێن ئیرانێ ژی دەست ب خەباتەکا مەزن کەن، لێ جارێ زوویە ئەم بێژین کا دێ ئەنجامێ ڤان سزایان چ بیت، ھەر چاوا بیت نھا ئەمریکا شەرەک مەزن ل دژی ئیرانێ دەستپێکریە و گەلێن بندەست ل ئیرانێ ب تایبەتی ژی گەلێ کورد چاڤەرێنە کو رژێم لاواز بیت دا ئەو بشێن بگەھنە مافێن خوە یێن رەوا.
ل دووماهيێ ژى گۆت: (لێ دڤێت ڤێ یەکێ ژی ژبیر نەکەین کو مەلایێن ئیرانێ ئەزموونەکا باش یا سەرەدەریێ ل گەل وەلاتێن رۆژئاڤا ھەنە، نھا وەلاتێن ئورۆپا ل دژی سزایێن ل سەر ئیرانێ نە، ھەکە ئەمریکا رژێما ئیرانێ باش تەنگاڤ بکەت رەنگە ل دووماھیێ تەھران ھەموو داخوازیێن ئەمریکا قەبوول کەت، چونکو ئەو دێ ھەر تشتەکێ کەن دا دەستھەلاتا خوە پارێزن، ڤێجا ھەکە ئەمریکا تنێ ل دووڤ بەرژەوەندیێن خوە بچیت وی دەمی دێ رەوشا گەلێن ئیرانێ خراب بیت، چونکو تنێ ب گوھۆرینا دەستھەلاتا نھا یا ئیرانێ دێ رەوشا خەلکێ ئیرانێ ب گشتی و یا کوردان ب تایبەتی باشتر لێ ھێت، ب مانا ڤێ رژێمێ چو گوھۆرین ل ئیرانێ دروست نابن).