پێنگاڤێن ڤەگوھاستنا مووچێ شەھید و زیندانیان بۆ سەر میلاکێ بەغدا دەست پێ کر
ئه‌ڤرۆ نيوز:
شاندەکێ وەزارەتا کاروبارێن شەھید و ئەنفالکریان یا ھەرێما کوردستانێ ل بەغدایە بۆ ئێکلاکرنا بابەتێ ڤەگوھاستنا مووچێن شەھید و زیندانیێن سیاسی بۆ سەر میلاکێ بەغدا و پەیڤدارێ وەزارەتێ ژی دبێژیت: لیست ھاتینە بەرھەڤکرن و ھەر دەمێ وەزارەتا شەھید و ئەنفالکریان و حوکمەتا عیراقێ بگەھنە رێککەفتنێ دێ مووچێ وان وەکو یێ عیراقێ لێھێت.
فوئاد عوسمان، پەیڤدارێ وەزارەتا شەھید و ئەنفالکریان بۆ رۆژناما ئەڤرۆ گۆت: “دوھی رۆژا ئێک شەمبی 4-11-2018 شاندەکێ وەزارەتا کاروبارێن شەھید و ئەنفالکریان سەرەدانا باژێڕێ بەغدا کریە ب مەرەما ڤەگوھاستنا مووچێ وێرسێن شەھید و ئەنفالکریان و زیندانیێن سیاسی بۆ سەر دەزگەھێ شەھیدێن عیراقێ، لەوڕا بڕیارە د چارچوڤێ سەرەدانا خوە دا ژ بۆی بەغدا، شاندێ ھەرێما کوردستانێ دگەل لایەنێن پەیوەندار ئەڤێ پرسێ بەحس بکەت و بھێتە ئێکلاکرن، ئەم سۆزێ ددەینە کەسوکارێن شەھید و ئەنفالکریان ئەڤا د شیاندابیت وەزارەت دێ بجە ئینیت”.
فوئاد عوسمان گۆتژی: “ئاریشا مە دگەل بەغدا بۆ ڤەگوھاستنا مووچێ وێرسێن شەھید و زیندانیێن سیاسیێن ھەرێما کوردستانێ ئەڤە، ھەر ئێک ل گورەی قانوونەکێ مووچە و ئیمیتازاتان ددەتە شەھید و زیندانیێن خوە، بەلێ ل گورەی بڕیارەکا بەرێ کو ژ لایێ پەرلەمانێ عیراقێ ڤە ھاتیە پەسەندکرن، پێدڤیە ھەردوک بھێنە ئێکگرتن و ب ئێک قانوون مووچێ شەھید و زیندانیان بھێتە رێکخستن، مە ژی لیستێن مووچێ شەھید و زیندانیێن سیاسە یێن خوە بەرھەڤکرینە و ھەردەمێ گەھشتینە رێککەفتنێ بۆ بەغدا دێ ھێنە ھنارتن”.