کوریا باشوور ھاریکاریێن نوشداری پێشکێشی ئاواران کرن
ئه‌ڤرۆ نیوز، ژيمان سه‌عيد:
ل ژێر چاڤدێریا فەرھاد ئەمین، پارێزگارێ دھۆکێ ب ھەڤکاری ل گەل قونسلیا گشتی یا کوریا باشوور ل ھەرێما کوردستانێ رێورەسمێن رادەستکرن و وەرگرتنا ھاریکاریێن ساخلەمیێ یێن وەلاتێ کوریا باشوور بۆ پارێزگەھا دھۆکێ ھاتنە گێران.
فەرھاد ئەمین پارێزگاری دھۆکێ دیارکر کو گەلەک یا گرنگە جڤاکێ نێڤدەولەتی و ھەموو رێکخراوێن جیھانی پشتەڤانیا پارێزگەھا دھۆکێ بکەن بۆ ئاواران چونکو ھەتا نوکە رێژەکا زۆر یا ئاواران ل دھۆکێ ماینە نەزڤرینە سەر جھـ ومالێن خوە دۆرێن 30 ھزار خێزانان ھێشتا د ناڤ کەمپان دا ماینە ئەڤە ژی راستی ژمارەکا مەزن و بارگرانیەکا مەزن ل سەر حوکمەتا ھەرێمێ، لەورا ئەم داخوازا ھاریکاریێ دکەن بۆ ئاوارە و پەنابەران.
ئاشکەرا ژی کر کو پێدڤیە حوکمەتا عیراقێ پاران دابین بکەت بۆ خەلکێ شنگال ئاکنجیێن شنگال ل کەمپان مفایی ژێ وەربگرن ھەتا نوکە پتریا ئاوارێن دھۆکێ خەلکێ شنگالێ نە ئەم دەنگێ خوە بلند دکەین کو جڤاکێ نێڤدەولەتی کێشەیا ئاواران چارەسەر بکەت بەری کێشەیێن مەزن دروست ببن یان رێ بۆ شنگالیان خوش کەن خەلک زڤریت و خزمەتگوزاریێن سەرەکی بۆ وان بھێنە دابین کرن یان ژی پێدڤیێن سەرەکی بۆ وان بھێنە دابینکرن ھەتا ئەم بشێن ل دھۆکێ خزمەتا وان بکەن.
سیروان مەحمەد ئەسود، رێڤەبەرێ گشتی یێ ساخلەمیا پارێزگەھا دھۆکێ ب وەکالەت دیارکر کو نڤیسینگەھا بەرسڤدانا قەیرانا ب ھەماھەنگی د گەل رێڤەبەریا گشتی یا ساخلەمیا دھۆکێ رابوون ب وەرگرتنا ڤان ھاریکاریێن کوریا باشوور پێشکێشی دھۆک کرین دێ بۆ قەزا سێمێلێ و زاخۆ بن چونکو پتریا ئاواران ل ڤان دەڤەران ئاکنجی بووینە ل سەر بنگەھـ و نەخۆشخانا دھێنە بەلاڤکرن دا کو ئاوارە مفایی ژێ وەربگرن پێکھاتی بوون ژ دەرمان و کەلوپەلێن نوشداری.
بارک کیون، قونسلی گشتی کوریا باشوور ل ھەرێما کوردستانێ دیارکر کو ئەڤرۆ 15-11-2018 ھاریکاریێن کوریا باشووری مە گەھاندینە دھۆکێ پتریا ئاواران مێڤانێن دھۆکێ نە، سالێن پێنجیان کوریا ژی تووشی ڤێ ئاریشێ بووینە و ملیونەھا خەلکێ کوریا ئاوارە بووینە، ئەم تووشی ئاریشێن مەزن بووینە سەرەرایی ھەموو ئاریشان جڤاکێ نێڤدەولەتی پالپشتیا کوریا کرن، لەورا ژی ئەم باش د ئێشێن خەلکێ ئاوارە دگەھین وھاریکاریا وان دکەین ھەر دەمێ ھاتنا داعش حوکمەتا کوریا سالانە بۆدجەیەکی تەرخان دکەت بۆ ھاریکاریا ئاواران و پەنابەران ئەڤە چار سالن کوریا ھاریکاریا حوکمەتا ھەرێما کوردستانێ دکەت د وارێ دابینکرنا دەرمان و پێدڤێن نوشداری و قوتابخانان دا کو ھاریکاریا ئاواران و پەنابەران بھێتە کرن.