خالا گۆمركى يا فه‌يديێ د ناڤبه‌را مووسل و دهۆك دا هاته راكرن
ئه‌ڤرۆ نيوز، رێوار مزوورى:
بەرپرسێ پشکا پیشەسازی ل ژوورا بازرگانی و پیشەسازی یا دھۆکێ بۆ ئەڤرۆ نیوز دیار کر کو خالا گۆمرکی یا فەیدیێ یا د ناڤبەرا دھۆک و مووسل دا ئەڤرۆ رۆژا ٤ى كانوونا ئێكێ ٢٠١٨ێ ھاتە راکرن.
حەمید مەجید رەبەتکی، بەرپرسێ پشکا پیشەسازی ل ژوورا بازرگانی و پیشەسازی یا دھۆکێ خویا کر کو بێ گومان پشتی چوونا سەرۆک مەسعود بارزانی بۆ بەغدا ھوسا دیار دبیت کو یێن گەھشتینە رێککەفتنەکێ و ئەڤرۆ خالا گۆمرکی یا فەیدیێ یا د ناڤبەرا دھۆک و مووسل دا ھاتە راکرن و گۆت: “ئەڤ رێیە یا ستراتیژیە د ناڤبەرا ئورۆپا و باشوورێ عیراقێ دا، چونکی ناڤەندەکا بازرگانی ل زاخۆ ھەیە ھەموو بازرگانێن عیراقێ کەرەستان ژ وێرێ دبەنە پارێزگەھا نەینەوا و پارێزگەھێن دی یێن عیراقێ”.
ناڤھاتی ئاماژە دا وێ چەندێ کو ڤێ خالا گۆمرکی گەلەک کارتێکرن ل بازرگانان کربوو، لێ راکرنا ڤێ خالا گۆمرکی دێ گەلەک بزاڤا بازرگانی خورتر لێ کەت، چونکی رێیەکا نێزیکە و گۆت: “ژ بلی بازرگانان وەلاتی ژی دێ شێن بۆ خوە مفای ژ ڤێ رێ یێ بینن و بارەکی بۆ خوە ببەنە پارێزگەھێن دی یێن عیراقێ ب فرۆشن”.
