گازا سپی دێ ل زاخۆ ھێتە بەلاڤکرن
ئەڤرۆ نیۆز، ئەمیر ئەترووشی:
قائیمقامێ قەزا زاخۆ راگەھاند، ل سەنتەرێ قەزا زاخۆ دەست ب بەلاڤکرنا گازا سپی ھاتیە کرن و دێ یا بەردەوام بیت ھەتا کو ھەموو ئاکنجیێن قەزا زاخۆ گاززا سپی وەردگرن و نھا ل ھەرسێ ناحیا ب دووماھی ھاتیە ب تنێ سەنتەرێ زاخۆ مایە.
بۆتان محسن ئامێدی، قائیمقامێ قەزا زاخۆ بۆ ئەڤرۆ نیۆز دیار کر، بەری نھا گازا سپی ل قەزا زاخۆ ل ھەموو دەڤەر و ناحیە و گۆندان ھاتینە بەلاڤکرن و ھەر خێزانەکێ ئێک بەرمیلا گازا سپى وەرگرتیە، نھا ژی دەست ب بەلاڤکرنا گازا سپی ل سەر خێزانێن سەنتەرێ قەزایێ ھاتیە کرن و دێ یا بەردەوام بیت ھەتا کو ھەموو ئاکنجیێن قەزا زاخۆ هه‌موو وەردگرن و گۆت: زاخۆ پێدڤی ب حەفت ملیۆن و 600 ھزار لیترێن گازا سپی ھەیە.
ئەو یەک ژی دیار کر کو ل قەزا زاخۆ ھەموویێ 38 ھزار خێزان تێدا دژین و ھەکە ھەر خێزانەک ئێک بەرمیلا گازا سپی کو 200 لیترێن گازا سپى تێدانە وەربگریت، ئەڤە دێ دیاربیت کو سالانە زاخۆ پێدڤی ب حەفت ملیۆن و 600 ھزار لیترێن گازا سپی ھەیە بۆ ئێک بەرمیل، بەلێ ئەگەر ھەر خێزانەک دو بەرمیلێن گازا سپی د سالێ دا وەربگریت، ئەڤە دێ سالانە پێدڤی ب 15 ملیۆن و 200 ھزار لیترێن گازا سپی بیت.