فۆكس نیوز: پرچهككرنا پێشمهرگهى د بهرژهوهندیا ئهمریكا دایه
ئهڤرۆ:ئهیاد بهروارى
رۆژناما (فۆكس نیوز) یا ئهمریكی، د راپۆرتهكا خوهدا ئاماژێ ب بهرخوهدان و ئازایهتیا هێزێن پێشمهرگێ كوردستانێ دكهت كو ل بهرهیێن شهڕى دژى تیرۆرستێن داعشێ سهركهفتن بدهستڤهئینایه و دبێژیت ژى، د بهرژهوهندیا ئاسایشا ئهمریكا دایه چهكێ پێشكهفتى بدهته پێشمهرگهى و پێشمهرگه ژى ب ههژى دیتیه بۆ پرچهككرنێ.
هێزێن پێشمهرگهى ل دهمێ بۆری ب سهرپهرشتیا راستهوخوه یا سهرۆك بارزانی، ئۆپهراسیۆنهكا مهزن ل دهڤهرێن زومار و شنگالێ دژى تیرۆرستێن داعش ئهنجامدا و سێ هزار كیلۆمهترێن چار گۆشه ژ وان دهڤهران رزگاركر و 400 تیرۆرست تێدا هاتنه كوشتن، ل دۆر وێ داستانا دیرۆكی یا پێشمهرگهى، گهلهك دهزگههێن راگههاندنێ شرۆڤهیێن تایبهت بۆ وێ سهركهفتنێ كرن و هندهك ژ وان وهسا نڤیسی كو پێشمهرگه پالهوانێ سالا 2014 یه، ژ وان ژى (فۆكس نیوز) كو ب ڤی شێوهى بهحسێ پێشمهرگهى دكهت” 16 پێشمهرگه ل چهپهرهكێ بچووك ل نێزیك مووسلێ ل هێلا بهراهیا شهڕى بوون دژى تیرۆرستێن داعشێ، گهش و ههوا ب شێوهكی یێ سار بوو كو باران دبارى و ب درێژییا شهڤێ بهرگری ل ئاخا كوردستانێ دكر، وان وهكو دایكێ سهحدكره ئاخا خوه و گهلهك ب باشى مهشق و راهێنان پێ هاتبوو كرن، ژ وێ چهندێ گرنگتر باوهریا وان یا وهسا بوو وهكو د بهرنیاس كو ئهو ههتا مرنێ دێ دژى تیرۆرستێن داعشێ شهڕى كهن”.
دیسا نڤیسی یه” داعش كو دهولهتهكه ژ روویێ شیانێن لهشكرى و چهكێ گران و داگیركرنا رووبهرهكێ مهزن یێ ئهردی ژ رۆژههلاتا ناڤین و ب هژمارا چهكدارێن خوه یێن تیرۆرست كو پترن ژ 200 هزار كهسان، ب هێزترین دهولهتا تیرۆرێ یه ل جیهانێ، بهلێ وێ دهولهتێ كو رووبهرهكێ مهزن ژ ئاخا سووریێ و عیراقێ و هندهك جهێن دى ل رۆژههلاتا ناڤین یێن داگیركرین، نهشیا خوه ل بهرامبهر ئیرادا پێشمهرگهى بگریت و وهكو پهیكهرهكێ بهفرى ژناڤچوو و بێ وره بوون و خوه ڤهكێش و رهڤین”.
رۆژناما ناڤبرى ژ زار دهڤێ پێشمهرگهكی ڤهدگوهێزیت” رۆژ ل دووڤ رۆژێ ئهم زێدهتر فێربووین كا چاوان تیرۆرستێن داعش بشكێنین، نوكه تێكشكاندنا داعشێ بۆمه یا بوویه پیشه و ب شێوهكێ گهلهك بلهز روو ب رووبونێ ل گهل دكهین و زیانێ دگههینینێ”.
رۆژناما ناڤبرى ئاماژه دا وێ چهندێ كو ههتا نوكه پێشمهرگه ب چهكێ ناڤهندی بهرامبهر تیرۆرستێن داعشێ شهڕى دكهت، ههرچهنده چهكێ تیرۆرستان یێ پێشكهفتى یه و ل وى دهمی ئهو چهكێ پێشكهفتى كهفته دهستێ وان دهمێ لهشكرێ عیراقێ دبن فهرمانا (مالكی) دا بوو و رهیێن وى هاتینه خوارێ و ژبهر داعشێ رهڤین و چهكی ئهمریكی بۆ تیرۆرستێن داعشێ بجه هێلای، بهلێ باوهریا پێشمهرگهى گهلهك ژ چهكێن گران یێن تیرۆرستان ب هێزتره و پێشمهرگه ب وێ چهندێ د بهرنیاسن كو ههتا مرنێ شهڕى دكهن و ب باوهریهكا مهزن ڤه ئهردى خوه د پارێزن، بهلێ ل گهل وێ چهندێ ژى، نۆكه هێزێن پێشمهرگهى چاڤهرێی ههڤپهیمانا خوهیه كو ئهمریكایه كو چهكێ پێشكهفتی بۆ بهنێریت.
چهندین كهنالێن راگههاندنێ ل جیهانێ د سالا 2014 دا دیاركربوو كو پێشمهرگهى سهلماند ئازاترین هێزه ل رۆژههلاتا ناڤین و ل شوونا ههموو جیهانێ یێ شهڕێ تیرۆرێ دكهت، بهلێ وهكو (فۆكس نیوز) ئاماژه پێكرى، پێدڤیه ئهمریكا ل سالا 2015 چهكێ پێشكهفتى ب پێشمهرگهى بدهت.