بانكێن حكومى دێ هێنه كێمكرن
ئه‌ڤرۆ نیوز:
ب رێیا به‌رنامه‌كێ حوكمه‌تێ، وه‌زاره‌تا دارایى وئابوورى ل هه‌رێما كوردستانێ دێ هژمارا بانكێن خوه ژ 97 بانكان بۆ 30 بانكان كێم كه‌ت.
مستەفا سەعید، رێڤه‌به‌رێ ته‌كنولۆژیا بانكان ل وه‌زاره‌تا دارایى راگه‌هاند” حوكمه‌تێ نه‌ڤێت بانك ب ڤى جۆرى بمینن، له‌وما وه‌زاره‌تا دارایى بانكێن خوه دێ كێم كه‌ت”.
ناڤبرى د داخۆیانیهكا رۆژنامه‌ڤانى دا، گۆت ” ب رێیا به‌رنامه‌كێ، حوكمه‌ت دخوازیت بانكێن خوه بۆ 30 بانكان كێم بكه‌ت، ئه‌ڤ چه‌نده ژى بۆ كارێن مه وب ته‌كنولۆژیكرنا بانكان ب ساناهى تره”.
گۆت ژى” نوكه 97بانكێن حكومى ل هه‌رێما كوردستانێ یێن هه‌ین”.
دیاركر” ئه‌و هه‌موو بانكێن حكومى گه‌له‌كن ول چو جهه‌كى ل جیهانێ وه‌كو وان نینه، ئه‌ڤێ چه‌ندێ ژى رۆتین یا به‌لاڤكرى ومه‌زاختیێن مه‌زن ژى خستینه سه‌ر حوكمه‌تێ، چونكى پشكه‌ك ژ بانكا د خانى وئاڤاهیێن ب كرێ دانه”.
خویاكر ژى” ب كێمكرنا بانكێن حكومى پاره ومه‌زاخیێن مه‌زن دێ بۆ حوكمه‌تێ ڤه‌گه‌رن وده‌مێ بانك دهێنه ئه‌لكترۆنیكرن، وى ده‌مى ئێك بانك ب تنێ دێ شێت كارێ 10 بانكان كه‌ت، هه‌روه‌سا ئه‌و خزمه‌تگوزریێن ل وان بانكێن ئه‌لكترۆنى دهێنه پێشكێشكرن گه‌له‌ك ب مفانه بۆ وه‌لاتى ومووچه‌خۆران”.
ل دۆر چاره‌نڤیسێ فه‌رمانبه‌رێن بانكان، گۆت” ئه‌و بانكێن دێ هێنه هه‌لوه‌شاندن، دێ هێنه تێكهه‌لكرن وچو كێشه نابیت وكارێ خوه دێ كه‌ن، چونكى حیساب بۆ فه‌رمانبه‌ران یا هاتیه كرن د پلانا تێكهه‌لكرنا بانكان دا ومافێن وان دێ ل به‌رچاڤ هێنه وه‌رگرتن”.
ئاماژه كر” دێ كار ب سیسته‌مه‌كێ نوو بۆ بانكێن حكومى هێته كرن وئه‌و بانكێن كارێ وان گه‌له‌ك، دێ هه‌لبژێرین ووان كه‌ینه سیسته‌مێ ئه‌لكترۆنى وكاركرن ب رێیا ده‌ستى نامینیت ودێ بیته ئه‌لكترۆنى وكار دێ زه‌لالتر وب له‌زتر بن وئاسانكاریه ژى بۆ وه‌لاتیان”.
