%99 يا ده‌نگان: پارتيا ئه‌ردوگان پاشڤه‌چوو
ئه‌ڤرۆ نيوز:
ره‌جه‌ب ته‌يب ئه‌ردوگان سه‌رۆكێ توركيا تووشى شكه‌ستنه‌كا مه‌زن بوو و پايته‌ختێ توركيا ژ ده‌ست دا و ب جوداهيه‌كا گه‌له‌ك كێم ژى ل سته‌مبۆل ل به‌رێ يه، ئه‌ڤ دو باژێره ژى پايته‌ختێن سياسى و گه‌شتيارى يێن توركيا نه و گرنگيه‌كا مه‌زن هه‌يه.
د هه‌لبژارتنێن باژێرڤانيێن توركيا دا كو دوهى ب رێڤه‌چوون، پارتيا داد و گه‌شه‌پێدانێ (ئاكه‌په) ژبلى پايته‌ختێ توركيا، ل سته‌مبۆل ژى ده‌نگێن خوه كێم كرينه، د ده‌مه‌كى دا ل سالێن نوتان سه‌رۆكێ توركيا واليێ وێرێ بوو.
ل سته‌مبۆل بينالى يلدۆم، سه‌رۆك وه‌زيرێن به‌رێ يێ توركيا و به‌ربژارێ ئاكه‌پێ ب تنێ ب چار هزار ده‌نگان ل به‌رى كانديدێ جه‌هه‌پێ يه.
ئه‌ردوگان پشتى مسته‌فا كه‌مال ئه‌تاتورك، رابه‌ره‌كێ ب هێزێ توركيايه، ده‌نگێن وى ژى ل سه‌ر بنه‌مايێن ئابووره‌كێ ب هێز و پشته‌ڤانيكرن ل خه‌لكێ ئايينى و نه‌ريتپارێزێ توركيا بوويه.
ره‌نگه ده‌نگده‌رێن دوهى هاتنه‌خوارا بهايێ ليره‌ى و زێده‌بوونا هه‌لاوسانێ و زێده‌يا رێژا بێكاريێ ل توركيا ژ بير نه‌كربيت.
ل چه‌ند باژێرێن باكوورێ كوردستانێ، هه‌ده‌په شيا چه‌ند باژێران ب ده‌ست ڤه بينيت كو دو سالان به‌رى نها به‌رپرسێن توركيا ب به‌هانه‌يا هه‌بوونا په‌يوه‌نديان ل گه‌ل په‌كه‌كێ ژێ ستاند بوون.
ل باژێرێن كوردى ژى يێن دياربه‌كر، ماردين، باتمان، هه‌كارى، سێرت، ره‌شه‌قلاس، وان و قه‌رس هه‌ده‌پێ سه‌ركه‌فتن ب ده‌ست ڤه ئينايه، به‌لێ ب ره‌نگه‌كێ چاڤه‌رێنه‌كرى شرناخ، ئاگرى و به‌دليس ژ ده‌ست داينه.
ژ سه‌دێ 99 ژ ده‌نگێن هه‌لبژارتنێن باژێرڤانيێن توركيا هاتينه جوداكرن و هه‌تا نها هه‌ده‌پێ 69 باژێرڤانى ب ده‌ست ڤه ئيناينه.
ب گۆره‌ى وان ئامارێن هاتينه به‌لاڤكرن هه‌تا نها 99%ێ ژ ده‌نگان بۆ هه‌لبژارتنێن باژێرڤانيان يێن جوداكرى، ب ڤى ره‌نگى يه: ئاكپارتيێ 796 باژێرڤانى ب ده‌ست ڤه ئينانه، جه‌هه‌پێ 246 باژێرڤانى، مه‌هه‌پێ 227 باژێرڤانى و ئى پارتى ژى 21 باژێرڤانى ب ده‌ست ڤه ئيناينه.
