ژڤانێ په‌رله‌مانێ چو نه‌ماينه و هێزێن پێشمه‌رگه‌يى ئێك نه‌گرتن
ئه‌ڤرۆ نيوز:
ئه‌ندامێ مه‌كته‌با سياسى يا ئێكه‌تى نشتيمانى كوردستان و فه‌رماندێ هێزێن 70 ده‌رباره‌يى ئێكگرتنا هێزێن پێشمه‌رگه‌يى ديار دكه‌ت كو هنده‌ك ئاماده‌كارى هاتينه كرن، به‌لێ پێدڤى ب زێده‌تر كراى هه‌يه؛ پاره‌كێ زێده ژى پێ دڤێت.
جه‌عفه‌ر شێخ مسته‌فا، ئه‌ندامێ مه‌كته‌با سياسى يا ئێكه‌تى نشتيمانى كوردستان و فه‌رماندێ هێزێن 70، ده‌رباره‌يى ئێكگرتنا هێزێن پێشمه‌رگه‌يى بۆ PDK.info دبێژيت: “هنده‌ك رێ يا هاتيه خوه‌شكرن، به‌لێ دڤێت خوه‌شتر لێ بكه‌ن، به‌رى هه‌ر تشتى دڤێت بودجه‌كێ باش بۆ بهێته ته‌رخانكرن هه‌تا كار ب رێڤه بچن وه‌كو دروستكرنا جهێن تايبه‌ت بۆ مه‌شقكرنا پێشمه‌رگه‌يى و خه‌لكێن ئه‌كاديمى بينن دا كو ب ره‌نگێ سه‌رده‌ميانه راهێنان ب پێشمه‌رگه‌يى بكه‌ن”.
ده‌رباره‌يى چه‌ك و ته‌قه‌مه‌نيان ژى گۆت: “پێدڤيا مه ب چه‌كێ نوو هه‌يه، هه‌تا شيانێن هێزێن پێشمه‌رگه‌يى باشتر لێ بكه‌ين”.
ده‌هـ رۆژێن ماين دێ ژڤانێ ده‌ستنيشانكرى يێ ئێكگرتنا هێزێن پێشمه‌رگه‌يى ژ لايێ په‌رله‌مانى ڤه ب دووماهى هێت و هێشتا چو تشت ديار نينه، د ڤێ ده‌ربارێ دا شێخ جه‌عفه‌ر دبێژيت: “د ڤان ده‌هـ رۆژان دا چو كارێن وه‌سان ناهێنه كرن و مه پێدڤى ب ده‌م و كريارێن زێده‌تر هه‌يه، ئێكگرتنا هێزێن پێشمه‌رگه‌يى پێدڤى ب هه‌ڤكاريێن هه‌موو لايان هه‌يه”.
