مللهتێ پهنچكری!
شهوكهت ئامێدی/سوید
هێژان دهمێ مرۆڤ بهرێ خوه ددهته ژیار و ژینا زۆربهی مللهت و جڤاكێن ڤێ زهڤیێ، چهند سهرچاڤێن بهرچاڤێن ههین، ژیانا خوه یا ڕۆژانه بێ دبهنه سهر و پاشكهفتهكی ژی پاشتێخن ژ بۆ نفشێ داهاتی، ئاڤ و خوانێن گوشتێ ئاڤی و گهشت و هاڤینگههن، یان گیانداری و چاندنن، یان دهرهاتێن بنئاخن وهك گاز و غاز و كهنزایێن دی.
سۆپاس ژ بۆ یهزدانێ مهزن ئهڤ ههمی سهرچاڤێن ژیانێ ل ههرێما كوردستانێ یێن ههین، لێ موخابن نه ئاڤهكا پاقژ، نه ساخلهمیهكا دروست، نه خواندنگههێن پێدڤی، نه كاهرهبایهكا بهردهوام. نه و نه و نه و…
ئهم ههمی ژی یێ ڕهخنه و گله و گازندان ژ دهسههلاتێ دكهین. بهرسڤا دهسههلاتێ ژی بهغدایه، دهور و پشتن، شهرێ ناڤخوه، چهتێن داعشان، ئاواره…
ئهڤه پارچهكا بچووكن ژ شاشی و نهزانینی و بێ ڕێبهریا مه ب خۆیه!
د شهڤا ههشتى ل سهر نههێ د كهناڵهكێ ڕاگههاندنێ دا هاته شلۆڤهكرن، ئهگهر پاره ههبن د دهمهكێ كێم دا دێ كارهبا بهردهوام بیت ژ بۆ سهرانسهری ههرێمێ. باشه هندهكێن پیرێن گازێ داگیردكهن و نهشێن سۆتهمهنی ژ بۆ وان ئێزگان پهیدا بكهن! ئهرێ هوون دزانن، د ڤان سالان دا ب ملیۆنان دۆلارێن داینه توركیا ژ بۆ بهرههمێ كرینا كارهبای، ئهرێ ئهگهر دو مووچه و بندیوار و پله پایێن توزۆبا ههمی خركربان، ما نوكه ههرێمێ كارهبا نه دفرۆتبا توركیا؟ ههروهكی ڕزینا دهخل و دانێن ههرێمێ ل بن نایلۆنان ڤه و یێ ئارێ كهڤن ژ توركیا دكرن. میوه و شینكاتیێ مه یێ دڕزیت و جۆتیارێن نهحهزان یێ قهله و دهولهمهند دبن. ئهگهر ههر پێنج سالان بهنداڤهكا ئاڤێ دروستكربا، نوكه نه ئهو ههمی بهفر وباران ژ بۆ باشوورێ عیراقێ دچوو نه ئهو ههمی ئاخا ب خێر و بێر ل گهل خوه دبر؟ د ههمان دهمدا هندهكێ نڤێژان دكهن و نابێنه زارۆیێن خۆ كارهبایا مالێ ههمیێ ههلنهكه. هندهكێ دو مووچا وهردگرن و یێ باسێ گهندهڵیێ دكهن. هندهكێ گلێشێن خوه تاڤێنه دهرڤه و سرۆشتێ ههرێمێ پیس دكهن و ل پشت میكرفوونان یێ باسێ وهڵات پارێزی دكهن، هنده بازرگان پیچهكا مای دێ كفنێ ژ بهر مریا داكهنن و یێ قهستا مالا خودێ دكهن، هندهك و هندهك و.. دهسههلات ژی ڕۆژهكێ ئهم پێكهاتین، ڕۆژا دووێ گازنهما، كارهبا كێم بوو… پشتی حهفت ههیڤان شوونا مژدێن چاكسازی و پرۆژان و ب ساناهیكرنا ههلین كاری ژ بۆ بێ كاران. مژده، مژده ئهم ب پێكهاتین. (پیرۆزبیت ژ بۆ لێكڤهكرنا پلهوپاران و پۆستان) ما دێ مرۆڤ بیر ل چ كهت و ل چ نهكهت. ل دووماهیێ دێ خوه دهته دهستێ قهدهرێ…
بلا ژ بیر ژی نهكهین هندهك ژی یێ شهڤ و ڕۆژان د كهنه ئێك ژ بۆ خزمهت و پێشڤهچوونا مللهتی و وهڵاتی، لێ ههر وهكو من زۆر جاران دوبارهكری. پیچهكا ڕاستیێ د ناڤ گهلهك شاشیێ دا یا شاشه و گهلهك شاشی د ناڤ پێچهكا ڕاستییێ دا یا ڕاسته.
چارهسهرێن ههمی كێشا و پاشڤهكهفتنا…پهروهردهكا پێدڤی یه و ههر كهسهك ژ خوه دهست پێ بكهت.
ته مه پهروهردهكا وهسا نهبیت. و بكهت دو زارۆ، دو مرۆڤ، دو مهزن، یاریێ ب ئێك یاری بكهن و بێ كێشه. دێ ههر بێین و بێینهڤه و ڕێ دێ ب درهنگ هێته بڕین.
