سووتن و تەعریب و داگیرکرن ل کەرکووک د بەردەوامن
ئه‌ڤرۆ نيوز:
ئەڤە بۆ دەمێ چەند رۆژانە پێلەکادیا تەعریبێ دەڤەرێن کوردستانی یێن دەرڤەی ئیدارەیا حوکمەتا ھەرێما کوردستانێ ڤەگرتیە و ل ھەموو لایەکی زۆلمەکا زۆر یا لسەر وەلاتیێن کورد ھەتا گەھشتیە رادەیەکی بەرھەمێ گەنمێ جووتیارێن کورد بەری بھێتە دوورین دھێتە سووتن بەرپرسەکێ پارتی ژی دبێژیت ب رۆژا رۆناھی غەدر ل وەلاتیێن کورد دھێتەکرن.
برۆسک تەحسین شاوێس، بەرپرسێ ناوچا لەیلان یا پارتی بۆ رۆژناما ئەڤرۆ دیارکر” ل سنورێ کەرکووک و دەوروبەرا ھەتا دگەھیتە سنورێ مە ناحیا لەیلان مەترسیێن مەزن لسەر وەلاتیێن کورد ھەنە، چونکە ھەر پشتی روویدانێن 16ی ئۆکتۆبەرێ و نەمانا دەستھەلاتا کوردان عەرەبێن دەڤەرێ زۆریێ ل وەلاتیێن کورد دکەن و حوکمەتژی یا ھاریکارە، بۆ نموونە ل سالێن حەفتیا گرێبەستێن جووتیارێن کورد بناڤێ ھژمارەک عەرەبێن شۆڤێنی ھاتینە کرن و گورەی مادێ 140 یێ دستوورێ عیراقێ ئەف گرێبەست ھاتینە ھەلوەشاندن و ئەردێ کوردان بۆ ڤەگەڕیایە، کو ئەڤە یێ دنیا ھەی ئەو کورد لسەر ئەڤی ئەردی دژین، بەلێ مخابن نوکە ئەو عەرەبێن شۆڤێنی یێن سەردەمێ بەعسیان ب زۆر ئەردێ مە داگیر دکر ڤەگەڕیاینە دەڤەرێ و گەفان ل جووتیارێن کورد دکەن، ھەتا ئەردێ کوردان داگیر بکەن، راستە ئەف وەلاتیێن عەرەب ھێشتا ب مالڤە نەڤەگەڕیاینە دەڤەرێن کوردی، بەلێ یێ سەرەدانا دەڤەرێ دکەن و دچنە فەرمانگەھێن حوکمەتێ بۆڤێ چەندێ بەھانەیەکێ پەیدابکەن بۆ داگیرکرنا ئەردێ کوردان، ب کورتی گەفێن مەزن لسەر خەلکێ دەوروبەرێ کەرکووکێ ھەنە.
برۆسک تەحسین شاوێس ئاماژەکر” تنێ ل سنورێ باژێڕکێ لەیلان ددەمێ نوکەدا گەفێن داگیرکرنا 10 گوند و پشکەکێ سەنتەرێ ناحیێ دھێتەکرن، کو ب ھزاران دۆنەمێن ئەردی پێکھاتیە و ھەمووژی ب بەلگەڤە ئەردێ کوردانە، ھەگەر بھێت و ل بەغدا چارەسەریەک بۆ ئەڤێ پێلا داگیرکرنێ نەھێتەکرن ئەڤە دێ دەڤەرێن کەڤنە ددەستێ عەرەبێن شۆڤێنی دا، ھەتا جڤاتا پارێزگەھا کەرکووکێ چو ھەلویست نینە ھەمبەر ئەڤان روویدانێن نوکە ھەی، ئەم نوزانین بۆچی ئیدارەیا پارێزگەھا کەرکووکێ گرێبەستێن عەرەبێن داگیر کەر ھەلناوەشینیت، چونکە ھژمارەکا زۆرا خانیێن کوردان ھێشتا بناڤێ وەلاتیێن عەرەبن و د ئەسلدا یێن کوردانە و پشتی پڕۆسا ئازادیا عیراقێ کورد چووینە ناڤا خانیێن خوە.