وه‌زیرێ په‌روه‌ردێ په‌یامه‌كێ ئاراسته‌ى قوتابیێن 12 ئاماده‌یى دكه‌ت
ئه‌ڤرۆ نیوز:
پشتیوان سادق وه‌زیرێ په‌روه‌ردێ ل هه‌رێما كوردستانێ ئه‌ڤرۆ شه‌مبیێ 8/6/2019 د په‌یامه‌كێ دا قوتابیێن 12 ئاماده‌یى پشت راست دكه‌ت سه‌باره‌ت وان تێبینیێن ل دۆر ئه‌زموونان به‌حس لێ دهێته كرن.
وه‌زیرێ په‌روه‌ردێ د په‌یاما خوه دا گۆت” ئه‌ڤرۆ شه‌مبیێ ل سه‌ر سه‌رنج وتێبینیێن هه‌وه‌یێن خوه‌شتڤى ل گه‌ل سه‌رۆكێ لژنا بلند یا ئه‌زموونان ورێڤه‌به‌رێ ئه‌زموونان وبه‌رپرسێن كونترۆلى كۆمبووین، هه‌رچه‌نده بابه‌تێ ئه‌زموونان راسته‌وخوه چو په‌یوه‌ندى ب منڤه نینه وچو ده‌مه‌كى ئه‌م مایتێكرنێ د كارێن وان دا ناكه‌ین، وئه‌م گه‌له‌ك د پشت راستین ژ ئه‌زموون ودلسوزیا به‌رێزێن به‌رپرس ژ ڤان كاران، به‌لێ هه‌ر چ سه‌رنج وتێبینیا هه‌وه هه‌بیت د ده‌مێ رۆژێن بۆرى دا، دێ دانوستاندنێن ئه‌رێنى ل سه‌ر كه‌ین”.
گۆت ژى” هیڤیدارم تنێ بخوینن وگوهێ خوه نه‌ده‌نه چ ئاخڤتنان، هه‌ر كه‌سه‌ك تنێ دێ مافێ خوه وه‌رگریت، سالێن بۆرى ژى ل ده‌مێ راگه‌هاندنا ئه‌نجامێن ئه‌زموونان رۆهن بوو كو 100% هه‌ر كه‌سه‌ك تنێ مافێ خوه دێ وه‌رگریت”.
پشتى د ئه‌زموونێن گشتى يێن 12 ئاماده‌یى دا، د چه‌ند وانه‌يان دا پرسيارێن شاش هاتين، نه‌زايبوونه‌كا زێده ل ده‌ڤ قوتابيێن 12 ئاماده‌یى په‌یدابوو و داخواز كرن كو د وان پرسياران نمران بده‌‌نێ و بۆ ب دروست ب هه‌ژمێرن.