تورکیا دخوازیت هه‌ڤركيێن خوە ل گەل وەلاتێن عەرەبی ب دووماھی بینیت
ئەڤرۆ:
ل گور راپۆتەکێ کو د رۆژناما (الحیاە) یا لەندەنی دا بەلاڤ بوویە، تورکیا دخوازیت پەیوەندیێن خوە ل گەل مسرێ و وەلاتێن عەرەبی ئاسایی بکەت.
ئەحمەد داوود ئوگلۆ سەرۆک وەزیرێن تورکیا دەمێ د کابینا بۆری یا ئەردۆگانی دا پۆستێ وەزیرێ دەرڤەیێ تورکیا وەرگرتی دیار کر کو ئەو دێ مەبدەئێ (بنەمایێ ئاریشان بەرامبەر وەلاتێن جیران) پەیرەو کەن. ئێک ژ ئارمانجێن سەرەکی یێن تورکیا ئەو بوو پشتی نێزیکی نیڤ قرنێ دوورکەفتنێ، دووبارە پەیوەندیێن خوە ل گەل جیھانا عەرەبی و ئیسلامی ب ھێز بێخیت. ل دەستپێکێ شیان تا رادەیەکێ د ڤێ چەندێ دا ب سەر کەڤن و سەرەرای پەیوەندیێن وان یێن باش ل گەل وەلاتێن کەنداڤی شیان پەیوەندیێن ب ھێز ل گەل سووریێ چێ کەن و ھەتا شیان ناڤبەینکاریێ د ناڤبەرا ھەر دو تەڤگەرێن فەلەستینی (حەماس و فەتح) دا بکەن و پاکستانێ و ئەفغانستانێ ژی ل سەر مێزا دانوستاندنان کوم بکەن. لێ ل گەل بەرپابوونا بھارا عەرەبی و دەرکەفتنا ئەنجامێن وێ ئەڤ چەندە ب تمامی ھاتە گوھۆرین و پەیوەندیێن تورکیا ل گەل پتریا وان وەلاتان تێک چوون.
کۆڤارا (Foreign Policy) ل تەباخا ٢٠١٣ د راپۆرتەکی ئاماژە دا وێ یەکێ کا چاوا تورکیا ژ سفرکرنا ئاریشەیان ل گەل جیرانان بەر ب سفرکرنا ھەڤالان چوو. ھەلبەت پشتی شورشا سووریێ دەستپێکری، تورکیا پشتەڤانیا شورشگێرا کر کو ئەڤە بۆ ئەگەر پەیوەندیێن تورکیا ل گەل سووریێ تێک بچن و ھەروەسا ڤێ چەندێ کاریگەریەکا راستەوخوە ل سەر تێکچوونا پەیوەندیێن تورکیا و عیراقێ ژی ھەبوو کو حوکمەتا عیراقێ ب رەنگەکێ ژ رەنگان پشتەڤانیا مانا رژێما ئەسەدی دکر.
پشتی عەبدولفەتاح سیسی بوویە سەرۆک کۆمارێ مسرێ و دەستھەلاتا ئیخوانێن مسرێ ب دووماھی ئینای، رەجەب تەیب ئەردۆگان د داخۆیانیەکێ دا گۆت: (کودەتایە ل مسرێ روودای و چ جوداھی د ناڤبەرا سیسی و بشار ئەسەدی دا نینە و ل مسرێ ژی دەولەتا تیرورێ دەستپێکر).
ئەڤ ھەلویستێ ئەردۆگانی بۆ ئەگەرێ تێک چوونا پەیوەندیێن تورکیا و مسرێ و ھەروەسا کاریگەریەکا راستەوخوە ل سەر پەیوەندیێن تورکیا و وەلاتێن کەنداڤی ژی کر، ژ بەر کو ژبلی قەتەرێ ھەموو وەلاتێن دی یێن کەنداڤی پشتەڤانیا دەستھەلاتا سیسی کر ل دژی ئیخوانان.
ڤێ دووماھیێ مسرێ و قەتەرێ ژی شیان تا رادەیەکێ پەیوەندیێن خوە ئاسایی بکەنەڤە کو ئەڤە بۆ ئەگەرێ دروستبوونا دودلیێ بۆ حوکمەتا تورکیا، ژ بەر کو ئاشتبوونا قەتەرا ھەڤپەیمانا تورکیا ل گەل مسرێ دێ بیتە ئەگەر کو ئێدی تورکیا ب تنێ بەرەڤانیێ ژ بادەکا ئیخوانێن ل مسرێ و دەڤەرێ بکەت و ئەڤە ژی کارەکێ ب ساناھی نابیت. ل گۆر راپۆرتەکا رۆژناما (الحیاە) جێگرێ سەرۆک وەزیرێن تورکیا بولەند ئارنج د داخۆیانیەکێ دا حەزا وەلاتێ خوە بۆ ئاشتبوونێ ل گەل مسرێ و وەلاتێن کەنداڤی دیار کر. ھەر چەندە تورکیا ژ ھەلویستێ خوە پاشڤە نەزڤریە دەمێ گۆتی کودەتا یا ل مسرێ دروست بووی، لێ بۆ جارا ئێکێ جێگرێ سەرۆک وەزیرێن تورکیا گۆت: (راستیەک ل مسرێ پەیدابووی و ل سەر ئاستێ دەولی رژێما وێ یا ھاتیە قەبوول کرن، لەوما ئەڤە دخوازیت کو ئەم چاڤخشاندنەکێ د پەیوەندیێن خوە دا ل گەل وان بکەین). دیسان حەزا وەلاتێ خوە بۆ دروستکرنا پەیوەندیێن باش ل گەل مسرێ و وەلاتێن کەنداڤی دیار کر ب تایبەتی وەلاتێن ئیماراتا عەرەبی یا ئێکگرتی و سعوودیێ.
پشتی داخۆیانیێن جێگرێ سەرۆک وەزیرێن تورکیا، وەزیرێ دەرڤە مەولود جاوش ئوگلۆ بالیۆزێن وەلاتێن عەرەبی ڤەخواندنە شیفخارنەکا تایبەت و دوپاتی ل سەر وێ چەندێ کر کو ناکوکی د ناڤبەرا تورکیا و وەلاتێن عەرەبی دا ب دووماھی بھێن.
ڤه‌گێر سه‌عدولا بۆ رۆژناما ئه‌ڤرۆ به‌رهه‌ڤكريه
