چێکرنا پرەکێ دێ دەمژمێرەکێ ژ رێیا دھۆک-ھەولێر کێم کەت
ئەڤرۆ:
ئەندامەکێ پەرلەمانێ کوردستانێ بۆ رۆژناما ئەڤرۆ دیار کر کو پرۆژێ پرا ل سەر رووبارێ زێ یێ مەزن دھێتە چێکرن گەلەکێ گرنگە و دێ رێیا دھۆک- ھەولێر گەلەک کورت کەت.
ئەندازیار بەھزاد زێباری ئەندامێ لیژنا ئاڤەدانکرنێ ل پەرلەمانێ کوردستانێ دیار کر کو ئەڤ پرە دێ جووتسایدە و ل نێزیکی گوندێ جمەی و گوندێ کوبال کو درێژیا 928 مەترایە و 41% ھاتیە بجھئینان و گۆت “ب تەمامبوونا ڤێ پرێ ھاتنوچوون د ناڤبەرا دھۆک و ھەولێرێ دا دێ دەمژمێرەکێ کێمتر بیت”.
ناڤبری خویا ژی کر کو کارێ دروستکرنا ڤێ پرێ گیروبوویە یان راوەستیایە، لێ لیژنا پەرلەمانێ کوردستانێ سەرەدانا ڤی پرۆژەی کریە و گۆت “ئەم چاڤدێریا ڤان جۆرە پرۆژان دکەین، چونکی د وارێ بجھئینانێ دایە و مە راپۆرتەک دروست کریە و مە بۆ سەرۆکێ پەرلەمانی رەوانە کریە و پەرلەمان ژی دێ بۆ جڤاتا وەزیران رەوانە، داکو دویفچوون ل سەر بھێتە کرن”.
