فەھیم عەبدولا: دێ ب ھووری چاڤدێریا ڤی پرۆژەی کەین
ئەڤرۆ نیوز، نیوار محەمەد سەلیم:
ئه‌ڤرۆ رۆژا ئێکشەمبی 22ی ئیلۆنا 2019ێ، جڤاتا پارێزگەھا دھۆکێ کۆمبوونا خوە یا ھژمارە (101) ل ھۆلا جڤاتێ گێرا و تێدا گەنگەشەیا چاوانیا کارکرنا سیستەمێ (سمارت میتر) یێ کارەبێ ب ئامادەبوونا ستافێ وەزارەتا کارەبێ و سەرپەرشتکارێن پرۆژەی کر و ژ لایەکێ دژی ڤە بەردەوامی دا گەنگەشەیا خوە ل سەر رەوشا کەرتێ پەروەردێ.
د ڤێ کۆمبوونا دا و تەوەرێ ئێکێ لژنا وەزارەتا پەروەردێ یا کو سەرپەرشتیا پرۆژەی دکەت روونکرن ل سەر چاوانیا کارکرنا وی و سیستەمی بەرچاڤی ئەندامێن جڤاتا پارێزگەھێ و سەرۆکاتیا وێ کرن و پاشان ژی گەنگەشە ل سەر بابەتی ھاتە کرن.
پاشان ژی د کۆنگرەکێ رۆژنامەڤانی دا، فەھیم عەبدولا حەمۆ، سەرۆکێ جڤاتا پارێزگەھا دھۆکێ بەحس ل گرنگیا ڤی پرۆژەی کر و دا زانین کو ل دووڤ گۆتنێن شاندێ مێڤان ل جڤاتێ دێ پرۆژەکێ سەرکەفتی بیت و ھەتا رادەکێ باش دێ رەوشا کارەبێ ل ھەرێما کوردستانێ بەر ب باشتر ڤە بەت.
ژ لایەکێ دی ڤە ئەندازیار محەمەد ئەحمەد سەرپەرشتێ پرۆژێ پیڤەرێ زیرەک ل وەزارەتا کارەبێ بەحس ل گرنگیا ڤی پرۆژەی کر و دا زانین کو ب گۆرەی ڤی پرۆژەی ئێدی کارەب ناھێتە دزین و دێ ب وەکھەڤی ل سەر وەلاتیان ھێتە بەلاڤکرن.
ئاشکەرا ژی کر کو ھەکە وەلاتیەک پارێ کارەبێ نەدەت ژی ژێ ناھێتە بڕین، ب تنێ دێ ژمارا ئەمپێرێن کارەبێ ھێتە کێمکرن و گۆت: “سۆزا وێ چەندێ نادەین کو دێ کارەب بیتە 24 دەمژمێری، بەلێ دێ رەوشا کارەبێ گەلەک باشتر لێ ھێت”.
دا زانین ژی کو ل ھەولێر ئەڤ تۆڕە بۆ زێدەتری 19 ھزار پشکداران ھاتیە گرێدان و سلێمانیێ ژی دەست ب دانا ڤان پیڤەران ھاتیە کرن و ل دھۆکێ ژی ئەڤی پرۆژەی دەست پێ کر و سالەک و شەش ھەیڤان دێ ڤەکێشیت ھەتا ب دووماھی دھێت و 300 ملیۆن دۆلار بۆ ھاتینە تەرخانکرن.
محەمەد ئەحمەد دەربارەی گرنگیا ڤی پرۆژەی ژی بۆ وەلاتیان دا زانین کو وەلاتی چو پارەی نادەن و بھایێ کارەبێ ژی ل سەر وەلاتیان ناھێتە زێدەکرن و ھەر وەکو بەری نھا دێ ھێتە وەرگرتن کو دبیتە 15% ژ تێچوویێ ل کارەبێ دھێتە مەزاختن.
د بەرسڤا پرسیارەکێ دا ل دۆر وێ چەندآ ھەکە کارەب بۆ 24 دەمژمێری دێ چ ل رەوشا موالیدان ھێتە کرن، فەھیم عەبدولا، سەرۆکێ جڤاتا پارێزگەھا دھۆکێ راگەھاند کو د ماوەکی دا وان خودانێن موالیدان مفایەکێ زۆر وەرگرتیە ھەکە نھا وەکو پێدڤی مفای ژ وان موالیدان وەرنەگرن ژی و گۆت: “کەسێ چو گرێبەست ل گەل خودانێن موالیدان نینن، ھەردەما کارەب دروست بوو، کارێ مە ژی دآ ل گەل وان ب دووماھی ھێت”.
د تەوەرێ دی یێ کۆمبوونا جڤاتا پارێزگەھا دھۆکێ ژی دا، بڕیار ھاتە دان چەند رێنما بۆ فرۆشگەھێن قوتابخانان بھێنە دەرکرن و دووڤچوونا زێدەتر ل سەر ئاڤاھیێن قوتابخان بھێتە کرن.