عه‌ره‌بێن كه‌ركووك يێ بزاڤێ دكه‌ن مه‌زنترين فراكسيۆن پێك بينن
ئه‌ڤرۆ نيوز:
عه‌ره‌ب يێ بزاڤێ دكه‌ن مه‌زنترين به‌ره ل كه‌ركووك پێك بئينن دا كو خه‌ونا خوه يا 16 سالان بجهـ بينن و پۆستێ پارێزگارێ كه‌ركووك ژ ده‌ستێ كوردان بيننه ده‌ر. بۆ ڤێ مه‌ره‌مێ ژى راكان جبۆرى پارێزگارێ سه‌پاندى يێ كه‌ركووك كاره‌كێ رژد بۆ ڤێ مه‌ره‌مێ دكه‌ت.
ئه‌ڤه پرۆسا هه‌لبژارتنان ل عيراقێ ده‌ستپێكرى، عه‌ره‌بێن كه‌ركووك نه‌شياينه ليسته‌كا هه‌ڤپشك پێك بينن و د هه‌لبژارتنێن دووماهيێ يێن جڤاتا نوونه‌رێن عيراقێ ژى 12 قه‌وارێن سياسى بوون و سێ كورسى ب ده‌ست ڤه ئينابوون، به‌لێ نها هه‌موو لايه‌نێن عه‌ره‌بى ڤان هه‌لبژارتنان ب چاره‌نڤيسساز وه‌سف دكه‌ن و بزاڤێ دكه‌ن ب ئێك ليست بچنه ناڤ هه‌لبژارتنان.
حاتم تائى، ئاخفتنكه‌رێ ب ناڤێ هه‌ڤپه‌يمانيا عه‌ره‌بى ل كه‌ركووك راگه‌هاند كو نها عه‌ره‌بێن كه‌ركووك به‌رهه‌ڤيا وێ چه‌ندێ دكه‌ن كو هه‌موو ب ئێك ليست پشكدارى هه‌لبژارتنێن جڤاتا پارێزگه‌ها كه‌ركووكێ ببن.
ئاشكه‌را ژى كريه كو د دووماهى كۆمبوون دا كو ل 28ى ڤێ هه‌يڤێ هاتيه كرن، شه‌ش ليست چووينه ناڤ هه‌ڤپه‌يمانيا عه‌ره‌بى و ب ڤێ چه‌ندێ ژى نها هه‌ڤپه‌يمانيا عه‌ره‌بى ژ 14 حزب و لايه‌نێن سياسى پێك دهێت و نها مه‌زنترين هه‌ڤپه‌يمانيا عه‌ره‌بى يه ل كه‌ركووك.
هه‌كه چ عه‌ره‌ب بزاڤێ دكه‌ن ل بن سيبه‌را راكان جبۆرى مه‌زنترين فراكسيۆنا عه‌ره‌بى ل وێ پارێزگه‌هێ رابگه‌هينن، به‌لێ هێشتا گه‌له‌ك لايه‌نێن سياسى نه‌چووينه بن وێ چه‌تر و ژ وان ژى هه‌ڤپه‌يمانيا نه‌سر ب سه‌رۆكاتيا حه‌يده‌ر عه‌بادى و لايه‌نێن سه‌ر ب محه‌مه‌د حه‌لبۆسى ڤه.
