نه‌هـ هونه‌رمه‌ندێن دهۆكێ د نه‌خوه‌شن
ئه‌ڤرۆ، نه‌وزاد هلۆری:
ل سالا 2019ێ دا هژماره‌كا هونه‌رمه‌ندان وه‌غه‌ركریه و هژماره‌كا دی ژی د نه‌خوه‌شن و پێدڤی ب چاره‌سه‌ریێ هه‌یه، سه‌رۆكا سه‌ندیكا هونه‌رمه‌ندێن كوردستانێ تایێ دهۆكێ ژی دیار كر كو پێدڤیه بیما چاره‌سه‌ریێ بۆ هونه‌رمه‌ندان بهێته دابینكرن.
ئه‌ڤین حسێن، سه‌رۆكا سه‌ندیكا هونه‌رمه‌ندێن كوردستانێ تایێ دهۆكێ بۆ رۆژناما ئه‌ڤرۆ دیار كر كو سالا 2019 بۆ هونه‌رمه‌ندان ساله‌كا نه‌خوه‌ش بوویه و گۆت: “هونه‌رمه‌ند ژی مینا هه‌موو تاكێن دی یێن جڤاكی وه‌غه‌ر دكه‌ن و نه‌خوه‌ش ژی دبن، به‌لێ یا گرنگ ئه‌وه ده‌ما كو هونه‌رمه‌نده‌ك نه‌خۆش دبیت و پێدڤی ب چاره‌سه‌ریێ بیت، دڤێت جهێن شوله‌ژێ كار ل سه‌ر چاره‌سه‌ركرنا وان بكه‌ن داكو ئه‌و ژی بشێن ل سه‌ر كارێن خوه و خزمه‌تكرنا جڤاكی به‌رده‌وام بن، ژ به‌ر كو پشكه‌كا مه‌زن یا هونه‌رمه‌ندان داهاتێ وان یێ كێمه و وه‌كو پێدڤی نه‌شێن چاره‌سه‌ریا خوه بكه‌ن”.
زێده‌تر گۆت: “ل سالا بۆری چار هونه‌رمه‌ندان گیانێ خوه ژ ده‌ستدایه كو ئه‌و ژی هونه‌رمه‌ندان (شانۆڤان شه‌عبان زاخۆی، شانۆڤان شه‌عبان سحربه‌ندێ ئاكره‌ی، مۆزیكژه‌ن زیره‌ك خه‌یات و شانۆڤان رفعه‌ت ره‌جه‌ب)، هه‌روه‌سا نه‌هـ هونه‌رمه‌ندێن دی ژی د نه‌خوه‌شن و چاره‌سه‌ریا خوه دكه‌ن كو ئه‌و ژی هونه‌رمه‌ندان (خه‌لیل قه‌دشی، قاسم ره‌مه‌زان، جه‌میل زكری، ئیسماعیل جومعه، ئازاد عه‌بدوللا سادق، نۆژدار محه‌مه‌د تاهر، ئدریس ره‌مه‌زان، ئیلهام ئاكره‌ی، خالد مه‌حمود) كو ئه‌ڤ یه‌كه ژی جهێ دلگرانكیێ یه”.
ئه‌ڤینێ دیار كر كو ئه‌گه‌ر هونه‌رمه‌ندان شیان ژی هه‌بن، دڤێت جهێن شوله‌ژێ كار ل سه‌ر خزمه‌تكرنا هونه‌رمه‌ندان بكه‌ن و زێده‌تر گۆت: “پێدڤیه بیما چاره‌سه‌ریێ بۆ هونه‌رمه‌ندان بهێته دابینكرن، به‌لێ جهێ داخێ یه هه‌تا نوكه نینه، له‌وڕا پرانیا جاران ئه‌م ب رێیا سه‌ندیكایێ داخوازێ ژ جهێن شوله‌ژێ دكه‌ین كو هاریكاریا هونه‌رمه‌ندێن نه‌خوه‌ش بكه‌ن، جهێ ده‌ستخوه‌شیێ و ئاماژه‌پێكرنێ یه كو د ده‌مێ بوری دا ئیدریس نێچیرڤان بارزانی خزمه‌ته‌كا باش بۆ هونه‌رمه‌ندان و چاره‌سه‌ركرنا وان كریه”.
سه‌رۆكا سه‌ندیكا هونه‌رمه‌ندێن كوردستانێ تایێ دهۆكێ خویا كر كو هونه‌رمه‌ندێن ناڤهاتی هه‌ر ئێك ژ وان خودانێ كومه‌كا خزمه‌تێن هونه‌ری و به‌رهه‌مایه و چه‌ندین كارێن جوان و گرنگ بۆ پێشخستنا كارێن هونه‌ری ل كوردستانێ كرینه و زێده‌تر گۆت: “هونه‌رمه‌ندێن دهۆكێ ب گشتی و ئه‌وێن كو نوكه د نه‌خوه‌ش ب تایبه‌تی ل سالێن نه‌خوه‌ش و گران دا، ده‌ست ب خزمه‌تكرنا هونه‌ری و جڤاكی كریه، چه‌ندین نه‌خوه‌شی و ئاسته‌نگ ژی كه‌فتینه د رێیا وان دا، به‌لێ ل سه‌ر كار و خزمه‌تكرنا هونه‌ری به‌رده‌وامن، نوكه ژی كارێن وان جهێ شانازیێ نه، ئه‌گه‌ر ره‌وشا وان یا ساخله‌میێ باش بیت دێ دوباره ده‌ست ب خزمه‌كرنا هونه‌ری و جڤاكی به‌رده‌وام بن”.
