شه‌ش مه‌هه گه‌میه‌كا په‌ترۆلا كوردستانێ نه‌هاتیه ڤالاكرن
ئه‌ڤرۆ نیوز، ڤه‌ده‌ر سوبحى
گه‌میه‌كا په‌ترۆلێ كو ملیون به‌رمیلێن په‌ترۆلا هه‌رێما كوردستانێ هه‌لگرتینه پشتی شه‌ش مه‌هان ل كه‌نداڤا مه‌كسیكێ مای، ل داویێ ده‌س ب لڤینێ كر و بارێ خوه ڤالا نه‌كر.
ئه‌ڤ گه‌میه به‌ری شه‌ش مه‌هان ژ ده‌ریا ناڤه‌راست به‌ر ب كه‌نداڤا مه‌كسیكی چو بوو ل باشورێ ئه‌مریكا لێ بێی كو بارێ خوه بدانیت رێیا ڤه‌گه‌ریانێ گرته به‌ر و به‌نده‌رێ مه‌كسیكی بجه هێلا.
ل دووڤ گوتنا رێڤه‌به‌رێ كومپانیا یونانی یا سه‌رپه‌رست لسه‌ر ڤی گه‌میێ ، گه‌میا (یونایتد كالاڤریتا) به‌ر ب هه‌رێما جه‌به‌لتارقا بریتانی ڤه دچیت ل باشورێ ئیسپانیا، پشتی بوو شه‌ش مه‌هان كه‌ڤتیه د ناڤبه‌را ناكوكیێن به‌غدا و هه‌ولێری لسه‌ر پارڤه‌كرنا داهاتێ په‌ترۆلێ.
له‌یس ئه‌لشه‌عیر رێڤه‌به‌ری پشكا قانونی ل وه‌زاره‌تا په‌ترۆلا ئیراقێ دبیژیت چ گوهرین نه‌كه‌فتینه سیاسه‌تا حكومه‌تا ئیراقێ و دڤیت په‌ترۆل ب تنێ برێیا وه‌زاره‌تا په‌ترۆلا ئیراقی بهیته هنارتن.
