نۆشدارەک: مە بەری زۆر وەلاتان کۆنتڕۆلا ڤایرۆسا کۆرۆنایێ کر
ئەڤرۆ نیۆز، قائید میرۆ:
پشتی کەرەنتینکرنا ١١ تاخێن باژێڕێ ھەولێرێ بەردەوام پشکنین بۆ ئاکنجیێن وان تاخان دھێتەکرن و رێڤەبەرێ خۆپاراستنا ساخلەمیێ ژی دبێژیت، ھەرێما کوردستانێ یا نێزیکە ل کۆنتڕۆلکرنا ڤایرۆسا کۆرۆنایێ.
دکتۆر سەرھەنگ جامباز، رێڤەبەرێ خۆپاراستنا ساخلەمیا ھەولێرێ بۆ ئەڤرۆ نیۆز دیارکر” ئەم شیاینە ھەتا رادەیەکی زۆر کۆنتڕۆلا رەوشا ڤایرۆسا کۆرۆنایێ بکەین و ھەرێما کوردستانێ ل پێش زۆر ولاتێن جیھانێ یە بۆ رێگریکرنێ ل بەلافبوونا ڤایرۆسا کۆرۆنایێ، مخابن ھەگەر ھەردو بەھیێن باژێڕێ ھەولێرێ نەبانە ئەڤە ھژمارا تووشبویێن کۆرۆنایێ زۆر کێم بوون.
رێڤەبەرێ خۆپاراستنا ساخلەمیا ئاشکراکر” ئەم شیاینە ھژمارەک تاخێن ھەولێرێ کەرنتین بکەین و تیمێن ساخلەمیێ بەردەوامن ل وەرگرتنا پشکنێن وەلاتیان بۆ کۆنتڕۆلکرنا رەوشێ، ئەف تاخێن نێزیکی بەھیێ ھەموو ھاتینە دورپێچکرن.
دکتۆر سەرھەنگ جامباز دبێژیت” زۆرترین پشکنین ل ھەولێرێ دھێنە کرن بۆ پشتڕاستبوونێ و نێزیکە ئەم بگەھینە ئەنجامەکێ دلخۆشکەر بۆ کۆنتڕۆلکرن دوماھی ئینان ب ڤایرۆسا کۆرۆنا، بەلێ پێدڤیە وەلاتی د ھاریکاربن و رێنمایێن خۆپارێزیێ بجە بینن، چونکە ڤایرۆسا کۆرۆنا دھێتە کۆپیکرن و ئێک حالەتژی مابیت ئەڤە دێ بەلافبیت دناڤا وەلاتیاندا.