رێنمایێن نوو بۆ دەستپێکرنا کارێ تەکسیان ل هەرێما کوردستانێ هاتنە بەلاڤکرن
ئەڤرۆ نیوز:
وەزارەتا ڤەگوهاستن و گەهاندنا حوکمەتا هەرێما کوردستانێ ئەڤرۆ ئەینیێ حەفت رێنمایێن نوو بۆ دەستپێکرنا کارێ تەکسیان بەلاڤکرن، لدووڤ وان رێنمایان پێدڤیە شۆفێر و نەفەر هەردو ماسک و دەستکێشان بکاربینن و رۆژانە ترۆمبێل بهێتە پاقژکرن.
وەزارەتا ڤەگوهاستن و گەهاندنا حوکمەتا هەرێما کوردستانێ گۆتیە، پشتی راوێژێ ل گەل وەزارەتا نافخۆ و لژنا روو ب بوونا کۆرۆنا یێ بریار هاتە دان ب دەستپێکرنا کارێ تەکسیان دناڤا پارێزگەهان و ئیدارێن سەربەخۆ دا، بۆ ڤێ مەبەستێ ژی شۆفێر دێ هێنە پابەند کرن ب رێنمایێن خوەپارێزیێ.
هەروەسا د وان رێنمایان دا هاتیە، ب تنێ رێک دهێتە دان ب هەلگرتنا دو نەفەران بۆ هەر گەشتەکێ و دڤێت ل کوشنێن پشتێ دا دابنیشن، هەروەسا دڤێت شۆفێر و نەفەر هەردو ماسک و دەستکێشان بکاربینن، بۆ هاتنوچوونێ دناڤبەرا پارێزگەهان و ئیدارێن سەربەخۆ ژی پشتی پرکرنا فۆرما ئەلکترۆنی یا وەزارەتا نافخۆ دێ رێک پێ هێتەدان.