ل دەستپێکا گۆلانێ دێ دەرگەهێن مزگەفتان ل سلێمانیێ هێنە ڤەكرن
ئەڤرۆ نیوز:
پشتی دروستبوونا فشارەكا زۆر یا خەلكێ و ماموستایێن ئاینی بۆ ڤەكرنا دەرگەهێن مزگەفتان ل هەیڤا رەمەزانێ دا، رێڤەبەرێ گشتی یێ ئەوقافا وێ پارێزگەهێ راگەهاندیە، ل 2 هەیڤا گۆلانێ دێ مزگەفتێن سەنتەرێ باژێرێ سلێمانیێ هێنە ڤەكرن.
سەرەرای ئاسایكرنا ژیانێ ژ چەندین لایانڤە و هاتنا هەیڤا رەمەزانێ، دەرگەهێن مزگەفتان ماینە داخستی، ڤێ چەندێ نەرازیبوونا خەلكێ موسلمان و ماموستایێن ئاینی لدووڤ خوە دا ئینا، ل پارێزگەها سلێمانیێ زێدەباری رێكخستنا هندەك خۆپێشاندانان، ل چەندین گوند و كۆمەلگەهان دەرگەهێن مزگەفتا هاتنە ڤەكرن.
فرەیدون غەریب رێڤەبەرێ گشتی یێ ئەوقاف و كاروبارێن ئاینی ل پارێزگەها سلێمانیێ راگەهاندیە: سەرەرای وێ فشارا زێدە، هەتا نوكە ل سەنتەرێ باژێرێ سلێمانیێ دەرگەهێن چ مزگەفتان نەهاتینە ڤەكرن، بەلێ ل گوند و كۆمەلگەهان ب رێژا 20% مزگەفت هاتینە ڤەكرن.
