رێزان کازۆ: ئەلبۆمان بھایێ خوە نەمایە
ئەڤرۆ نیوز، رێوار محەمەد رەشید:
سترانبێژا کورد رێزان، کو کچا دەنگبێژێ بەرنیاسێ باکوورێ کوردستانێ (کازۆ)یە و نوکە ل باژێرێ ئیستەنبۆلێ یێ وەلاتێ تورکیا دژیت د دیدارەکێ دا بۆ بەرپەرێ ھونەری یێ رۆژناما ئەڤرۆ دیار کر کو ل رۆژێن بۆری وێ نووترین کلیپا خوە ب ناڤێ (سۆر گۆل) بەلاڤکر کو ئەڤ کلیپە ژ پەیڤ و ئاوازێن دەنگبێژ (کازۆ)ی بوو و (یەشار باش ئوزدەیش) ب کارێ بەلاڤکرنا مۆزیکێ راببوو و (فەیزوللا یەلدرێم) ژی ب کارێ دەرھێنەریێ راببوو و ئەڤ کلیپە ل باژێرێ وانێ یێ باکوورێ کوردستانێ ھاتبوو وێنەکرن. ناڤھاتیێ ئاماژە دا وێ چەندێ کو ئەو چوجاران ژ کارێ ھونەری ڤەنەقەتیایە و چەندین سترانێن نوو بەرھەڤکرینە و ل دەمەکێ نێزیک دێ تۆمارکەت و گۆت: “ل رۆژا پێنجشەمبیا بھێت دێ سترانەکا دی یا کۆکتێل کو بابەتێ وێ ل دۆر ئەڤینیێ یە کلیپ کەم کو نوکە ژ قووناغا تۆمارکرنێ ب دووماھی ھاتیە و من دڤیا ڤێ سترانێ ژی ل باکوورێ کوردستانێ کلیپ بکەم، بەلێ ژ بەر مەترسیا ڤایرۆسێ کۆرۆنایێ ئەز دێ نەچاربم ل باژێرێ ئیستەنبۆلێ یێ وەلاتێ تورکیا کلیپ بکەم”. رێزانێ خویا کر کو ئەو ھزر د چێکرنا چو ئەلبۆمان دا ناکەت ژ بەر کو ب دیتنا وێ نوکە چێکرنا ئەلبۆمان چو بھایێ خوە نەمایە و ھەمی بوویە بازرگانی و بتنێ کۆمپانی ژێ مفادار دبن و ھەر ژ دەستپێکا من یا کارێ ھونەری و ھەتا نوکە ژ بلی مالباتا من چو کەسێن دی پشتەڤانیا من یا دارایی بۆ کارێن من یێن ھونەری نەکریە و گۆت: “بەری نوکە من سترانێن دوقۆلی گۆتینە و حەز دکەم نوکە ژی سترانێن دوقۆلی ل گەل ھندەک ھونەرمەندێن خودان شیان بێژم کو سەربوورەکا باش د بوارێ ھونەری دا ھەبیت”.
