نێزیکی 30 سالانە كارێ چێكرنا سۆپێن داران دكه‌ن
ئه‌ڤرۆ نیوز ، زنار تۆڤى:
مێردین محه‌مه‌د ئاسنگه‌ره‌كه، د دیداره‌كێ دا بۆ ئه‌ڤرۆ نیوز دبێژیت: ئه‌ڤه 30 ساله ئه‌و كارێ ئاسنگه‌ریێ ل باژێرێ دهۆكێ دكه‌ت، ژ بابێ خوه فێرى ڤى كارى بوویه و چه‌ندین گه‌نج ژى ل گه‌ل وى كارێ چێكرنا سۆپێن داران و كۆچكێن خوارنگه‌هان دكه‌ن، ئه‌ڤ ساله بازارێ فرۆتنا سۆپێن داران یێ گه‌رمه و رۆژانه هژماره‌كا سۆپان دفرۆشیت، ئه‌ڤ ساله كارێ وان ژ سالا بورى باشتره، رۆژانه ئه‌و ل گه‌ل وان كاركه‌رێن ل گه‌ل وى كار دكه‌ن دناڤبه‌را ” 8_ 10″ سۆپێن داران چێدكه‌ن، ئه‌و سێ ره‌نگێن سۆپان چێدكه‌ن و بهایێ وان ژى دناڤبه‌را ” 30_55″ هزار دیناران دایه، ئه‌و سۆپان لدووڤ داخوازیا خه‌لكێ چێدكه‌ن، پلێتا هنده‌كان یێ ته‌نكه و یێن هنده‌كان ژى یێ ستووره و لدووڤ داخوازیا بكران سۆپه دهێنه دروست كرن.
ناڤهاتى زێده‌تر گۆت: پرانیا پلێتى بۆ وان ژ وه‌لاتێ ئیرانێ دهێت، هه‌ر چه‌نده هێشتا وه‌رزێ زڤستانێ ده‌ست پێنه‌كریه، لێ هه‌ر خه‌لك سۆپان دكرن، سالێن به‌رى نوكه وان حه‌مامێن داران ژى چێدكرن، لێ نوكه چێناكه‌ن، د نوكه دا خه‌لكێ گوندان پتر سۆپان دكرن، هه‌روه‌سا وان لبه‌ره كارێ خوه به‌رفره‌هتر لێ بكه‌ن، ژ پێخه‌مه‌ت پتر خه‌لك ل ده‌ف وان كار بكه‌ت، هه‌ر چه‌نده نوكه گه‌له‌ك ژ خه‌لكێ به‌رێ خوه دایه ڤى كارى، لێ هه‌ر كارێ وان یێ باشه و نوكه ئه‌و ل گه‌ل هه‌ر چار برایێن خوه و هنده‌ك ژ كه‌سێن نێزیكى خوه كارێ ئاسنگه‌ریێ دكه‌ن، د ڤى وه‌رزى ژى دا كارێ وان یێ سه‌ره‌كى چێكرنا سۆپێن دارانه، هه‌ر چه‌نده كارێ چێكرنا سۆپان و چێكرنا بوریێن وان یێ ب مژوولاهیه و گه‌له‌ك ده‌م پێڤه دچیت، لێ ئه‌و یێن فێربووین و خۆشیه‌كێ ژى ژ كارێ خوه دبینن.
