جانێ دێ دو بەرھەمێن نوو بەلاڤ کەت
ئەڤرۆ نیۆز:
سترانبێژا کورد جانێ حەیران کو نوکە ل پارێزگەھا ھەولێرێ دژیت ددیدارەکێ دا بۆ بەرپەرێ ھونەری یێ رۆژناما ئەڤرۆ دیار کر کو نوکە ئەو مژوولی چێکرنا دو بەرھەمێن نوو یێن ھونەری یە کو ئێک ژ وان ژ ١٢ تراکان پێک دھیت و ھەموو تراک وێ ب زمانێ عەرەبی گۆتینە، ژ بەر کو وێ حەز ژێکەرێن دەنگێ وێ عەرەب ژی ھەنە و گۆت: “ئەز یا ڤی بەرھەمی ل ھەولێرێ تۆمار دکەم و من ل بەرە چار سترانان ژێ کلیپ ژی بکەم”.
ناڤھاتیێ ئاماژە دا وێ چەندێ کو د ھەمان دەم دا ئەو یا بەرھەمەکێ دی ژی تۆمار دکەت کو ئەو ژی ژ ١٢ تراکان پێک دھێت شەش ستران ژ وان ب زمانێ کوردی و شەشێن دی ژی ب زمانێ تورکی نە و گۆت: “ئەز سترانبێژا ئێکێ یا کوردم دگەل سترانێن کوردی سەمایا مسری دکەم و ئەز ب گۆتنا سترانێن خەمگین خەمێن خوە درەڤینم”.
جانێ خویا کر کو ئەو یا بەرھەڤە پشکداریێ د ئاھەنگێن خێرخوازی دا بکەت و وێ ل پارێزگەھا ھەولێرێ چەندین جاران پشکداری د ڤان ئاھەنگان دا کریە و ھەکە ل دھۆکێ ژی ئاھەنگێن ژ ڤی جۆری ھەبن ئەو یا بەرھەڤە پشکداریێ تێدا بکەت و گۆت: “بەھرا پتریا سترانێن ئەز دبێژم بابەتێ وان ل دۆر ئەڤینیێ یە”.
