د سالا نوو دا دێ پشکداریێ د چەندین پێشانگەھان دا کەت
ئەڤرۆ، زنار تۆڤی:
خانما شێوەکار مریەم ئیشۆ، کو خەلکا باژێرێ عەفرینێ یە ل رۆژئاڤایێ کوردستانێ و ئەڤە دەمێ ھەشت سالانە ل وەلاتێ ئەلمانیا دژیت، د دیدارەکێ دا بۆ رۆژناما ئەڤرۆ دیارکر کو دژیەکێ بچووکدا وێ حەز ژ کارێ شێوەکاریێ دکر، و ل سالا ٢٠٠٨ پەیمانگەھا ھۆنەرێ شێوەکاری ل باژێرێ حەلەبێ خواندییە، ب رەنگەکێ ئەکادیمی دەست ب چێکرنا کەڤالان کرییە و ھەتا نوکە ل سەر کارێ خوە یا بەردەوامە.
ناڤھاتیێ گۆت: ل سالا ٢٠١٧ وان گرۆپەک ب ناڤێ (رەنگ ئارت) یێ شێوەکاری دانایە و پتری ٧٠ شێوەکارێن کورد ژ ھەر چار پارچێن کوردستانێ پشکداری د وی گرۆپی دا کرییە، ھەروەسا ئەو ب رەنگەکێ خۆبەخش د وی گرۆپی دا کار دکەن و کەڤالان چێدکەن، وان گەلەک کەڤال د وی گرۆپی دا چێکرینە و ئەو کەڤال ل گەلەریێن وەلاتێ ئەلمانیا نیشا داینە، ھەروەسا ھندەک کەڤال فرۆتینە و داھاتێ وان ژی بۆ خەلکێ عەفرینێ و سەرێ کانیێ ل رۆژئاڤا ھنارتینە و نوکە ژی ئەو گرۆپە بەردەوام کار دکەت و وان بەرھەڤی بۆ چەندین پرۆژێن نوو کرینە.
ل دووماھیێ گۆت: ھەتا نوکە وێ پشکداری د چەندین پێشانگەھێن شێوەکاری دا کرییە ل رۆژئاڤا و ل ئەلمانیا ژی، ھەروەسا ناڤارۆکا کەڤالێن وێ ل سەر ئێش و ئازارێن خەلکێ کوردستانێ نە، دیسان ئەو بۆ خەلکێ بیانی دیار دکەت، کو گەلەک دەردەسەری و مالوێرانی ب سەرێ مللەتێ کورد ھاتینە، ھەروەسا بەحسێ دابەنەریتێن کوردان ژی دکەت، ھەتا نوکە وێ چەندین کەڤالێن خوە فرۆتینە و ھندەک کەڤالێن خوە ب ٤٠٠ یورۆیان فرۆتینە، و ب دیتنا وێ د نوکە دا ھونەرێ شێوەکارێ کوردی د ئاستەکێ باش دایە، ھەروەسا بۆ سالا ٢٠٢١ دێ پێشانگەھەکێ ل وەلاتێ فرەنسا و ل چەندین باژێرێن ئەلمانیا ڤەکەت.
