کوڤارەکا ئەمریکی: بادەکا عیراقێ دێ ئێک ژ کارێن سەرەکی یێن بایدنی بیت
ئەڤرۆ:
کوڤارا فۆرین پۆلسی یا ئەمریکی بابەتەک ل دۆر پرسا عیراقێ بەلاڤکر و بەحس ل وێ چەندێ دکە تکو تەقینا تیرۆرستی یا پێنجشەمبیا بۆری دڤێت زەنکەکا ئاگەھدار کرنێ بیت بۆ بایدنی و کۆچکا سپی تاکو وەکو ترامبی عیراقێ پشت گوە نەھاڤێژن و گرنگیێ ب رەوشا عیراقێ بدەن.
وی کوڤارێ دیارکر ژی کو ھەلبژارتنێن داھاتی ل عیراقێ دەلیڤەکا گرنگە گوھۆرین د رەوشا وەلاتی ودانانا سنورەکی بۆ کاریگەری و ھەژموونا ئیرانێ ل سەر عیراقێ بیت، ئەڤە ھەکە ئەمریکا و حوکمەتا نوو ل وی وەلاتی ب سەرۆکایەتیا بایدنی گرنگیەکا زوورتر ب عیراقێ بدەن و وەکو دونالد ترامپی حوکمەتا عیراقێ پشت گوە نەھاڤێژیت و عیراقێ بۆ ئیرانێ بجە بھێلن.
ھەروەسا بەلاڤکر” ل پێنجشەمبیا بۆری دو پەقینێن خوەکوژی ل بەغدا روودان و ٣٢ کەس ھاتنە کوشتن و ١٠٠ کەس ژی برینداربوون، ئەڤە ژی خویناوی ترین ھێرش بوو د دەمێ دو سالێن بۆری دا دیسا پشتی رۆژەکێ ب تنێ بوو ژ وەرگرتنا بایدنی بۆ دەستھەلاتێ ل ئەمریکا، ھەرچەندە کریارەکا تاوانکاری و تیرۆرستی یا نەچاڤەرێکری بوو، د ھەمان دەم دا ئەو وەکو زەنگەکێ بوو کو پاشەرۆژا عیراقێ ھەتا نوکە یا رۆھن و دیار نینە و دووماھی ب تیرۆرێ نەھاتیە و ھەتا نوکە عیراق یا دبن گەف و مەترسیێن مەزن دا و توندرەو ب بەردەوامی دشێن گرفت و کریارێن ترسناک ئەنجام بدەن”.
دیارکر ژی” کاریگەریا ستراتیژیا سەرکەفتنێ ل عیراقێ ژ لایێ ئەمریکا ڤە، ل سەر تمامیا رۆژھەلاتا ناڤین دێ رەنگ ڤەدەت، بەرۆڤاژی ژی ھەر راستە، ھەکە ئەمریکا ل عیراقێ یا سەرکەفتی نەبیت، دێ ل ھەموو رۆژھەلاتا ناڤین زیان گەھیتێ، لەوما عیراق بوویە خالا شکەستن و سەرکەفتنا ئەمریکا ل رۆژھەلاتا ناڤین و جیھان ب گشتی و عیراق ب تایبەتی چاڤەرێ رەفتارا ئیدارا ئەمریکی یا نوو و تیما جۆ بایدنی ل بەرامبەر عیراقێ دکەت”.
وێ کۆڤارا ئەمریکی ئاماژەکر” لایەنێ ھەرە گرنگ و ئەرێنی یا ئیدارا نوو یا ئەمریکی شارەزایی و ئاشنایی زۆر یا سەرۆکێ نوو بایدنی و بەرپرسێن حوکمەتا وی ب کاروبارێن عیراقێ و رۆژھەلاتا ناڤین، ئەو ب تمامی نێزیکی روودانانە و زوورترین ھووردەکاری ل دۆر رەوشا عیراقێ ل بەردەستن، چونکە پێشتر ھەر جۆ بایدن ب خوە بەرپرسێ بادەکا عیراقێ بوو ل دوو خۆلێن سەرۆکایەتیا باراک ئۆبامای کو وی دەمی بایدن جێگرێ سەرۆکێ ئەمریکا بوو”.
