پەیکەرەک بۆ ھونەرمەند غازی بامەرنی دێ ھێتە چێکرن
ئەڤرۆ، سالار محەمەد دۆسکی:
چل رۆژ ل سەر وەغەرکرنا شانۆکارێ بناڤ و دەنگ د.غازی بامەرنی دا دەربازدبن، بڤێ ھەلکەفتێ رێڤەبەریا گشتی یا رەوشەنبیری و ھونەری ل دھۆکێ، دوھی ٢٥/١ ل ھولا سەنتەرێ پێشمەرگە ب بەرھەڤبوونا ھژمارەکا ھونەرمەند و مالباتا وی چل رۆژیا وی ساخکرن.
ئەمیر عەلی، رێڤەبەرێ گشتی یێ رەوشەنبیری و ھونەری ل دھۆکێ پەیڤەک پێشکێشکر و تێدا پەسنا رۆلێ ھونەرمەندێ وەغەرکری کر د بزاڤێن ھونەری دا ل گشت کوردستانێ و رۆلێ وی ل پشکا شانۆیێ ل زانکۆیا دھۆک، کو ھونەرێ شانۆیێ بۆ خوە کربوو خودیک کو تێدا پەیاما مللەتێ خوە بگەھینت، ھەروەسا سالوخەتێن مرۆڤایەتی د ناخێ وی دا کوم دبوون، مرۆڤەکێ نشتیمان پەروەر و وەلات پارێز و رژد بوو ل سەر کاری و پەروەردەکارەکێ گەلەکێ ھێژا بوو، ژیانا وی یا جودا بۆ ژ خەلکێ ئاسایی و دڤیا بەردەوام خزمەتێ بکەت.
ئەڤین حسێن، سەرۆکا لقێ دھۆک یا سەندیکا ھونەرمەندێن کوردستانێ د پەیڤەکێ دا گۆت: ئەو ژلایێ نەقیبێ سەندیکا ھونەرمەندێن کوردستانێ ڤە ھاتیە ئاگەھدارکرن کو دێ پەیکەرەک بۆ ھونەرمەندێ وەغەرکری غازی بامەرنی ل باژێرێ سلێمانیێ ھێتە چێکرن و ل رۆژا شانۆیا جیھانی دێ پەردە ل سەر ھێتە لادان.
د.مزگین محەمەد حەسەن، راگرێ کولیژا زانستێن مرۆڤایەتی ل زانکۆیا دھۆک، دپەیڤا خوە دا گۆت: د. غازی بامەرنی مامۆستایەکێ خودان رەوشت و پاک ھەبوو و ئەڤە بوویە جھێ وێ چەندێ ھەموو حەزژێ بکەن و دەمێ مە پێدڤی پێ ھەی ژ وەلاتێ فرەنسا ھاتە کوردستانێ بۆ فێرکرنا قوتابیان و خزمەتا ھونەرێ شانۆیێ ل زانکۆیا دھۆکێ، کارێن مەزن ئەنجامدا بوون و داستاندا (مەم و زینێ) یا ئەحمەدێ خانی مەزنترین پرۆژە بوو ل سەر ئاستێ ھەرێما کوردستانێ بۆ ھزرا نەتەوەیی ھزرا وی یا ڤەکەری و گەلەک کارێن مەزنتر ھزرا وی دا ھەبوون و چ بۆ بھێتەکرن یا کێمە و ئەم ھەموو شاھدێن رەوشت و کارو بزاڤێن وی نە.
عەلی ئەمیر، پەیڤا بنەمالێ خواند و تێدا سوپاسیا ھەموو بەرھەڤ بوویان کر کو ئەڤ چالاکیە ئەنجام داین، ھەروەسا ھەموو ھونەرمەند و خەلکێ دھۆکێ کو ل رۆژا وەغەرکرنا وی ل گورستانێ بەرھەڤبووین.
ل دووماھیێ پەردە ل سەر سەرپەیکەرەکێ ھونەرمەندێ خودێ ژێ رازی ھاتەلادان کو ژ لایێ ھونەرمەند (شێراز عەزیز) ھاتبوو چێکرن،، ھەروەسا کورتە فلمەک ل سەر ژیانا ھونەرمەندی ھاتە نیشادان کو ھاتبوو بەرھەفکرن ژلایێ ھونەرمەند (ھلکەت ئدریس) ڤە.
