دەرھێنەرەک: نوکە خەلکێ بیانی بۆ خوە مفای ژ چیرۆکێن کوردی دبینن
ئەڤرۆ، زنار تۆڤی:
دەرھێنەر ھەژار عومەر، خەلکێ باژێرێ ھەولێرێ یە و نوکە ژی ل ھەمان باژێر دژیت، د دیدارەکێ بۆ رۆژناما ئەڤرۆ دیار کر: وی د ھەموو وارێن فلمسازیێ دا کار کرییە، لێ نوکە کارێ دەرھێنانێ دکەت، ھەروەسا ل سالا ٢٠١٢ وی ئێکەم فلمێ دکیۆمێنتاری چێکرییە، ھەتا نوکە وی چار کورتە فلم و فلمێن دکیۆمێنتاری چێکرینە، دیسان وی وەکو ھاریکارێ دەرھێنەری ژی د چەندین فلمان دا کار کرییە، نوکە ژی ئەو مژوولی چێکرنا فلمەکێ ئەنیمەیشنە، کو ئەڤ فلمە ل سەر کەتوارێ جیھانێ یە، دیسان وی لبەرە سپۆنسەرەکی بۆ چێکرنا ڤی فلمی پەیدا بکەت، چونکی لدووڤ گۆتنا وی دێ گەلەک مەزاختن ل ڤی فلمی چیت.
ناڤھاتی ئەو ژی گۆت: وی وەکو ئەکتەر ژی پشکداری د ھندەک زنجیرێن درامایی و کورتە فلمان ژی دا کرییە، د وارێ سینەمایێ دا، ئەو پتر حەز ژ کارێ وێنەگرتنێ و دەرھێنانێ دکەت، لێ نوکە ئەو پتر کارێ دەرھێنەریێ دکەت، ھەروەسا نوکە ل کوردستانێ سینەما د ئاستەکێ ناڤنجی دایە، ئەڤ چەندە ڤەدگەریت بۆ قەیرانا دارایی و بەلاڤبونا ڤایرۆسێ کۆرۆنایێ، ھەر چەندە ل ھەموو جیھانێ سینەما گەلەک پارەی پەیدا دکەت و گەلەک داھات ژ کارێن سینەمایی دھێت، لێ ئەڤە ل کوردستانێ نینە و ھەتا نوکە سینەما نەبوویە کەلتۆر ل دەف خەلکێ مە، خەلک دەمێ خوە تەرخان ناکەت بۆ کرینا پلێتان و بەرێ خوە نادەتە فلمێن سینەمایی، ھەر چەندە مە چیرۆک و سەرھاتیێن گەلەک باش ھەنە د وارێ سینەمایێ دا، لێ ھەتا نوکە ئەم نە شیاینە مفای ژ وان چیرۆکان وەربگرین و بکەینە فلمێن سینەمایی.
وی دەرھێنەری گۆت ژی: نوکە خەلکێ بیانی بۆ خوە مفای ژ چیرۆکێن کوردی دبینن و بۆ خوە دکەنە فلمێن سینەمایی، ھەر چەندە مە ئەکتەرێن گەلەک باش و خودان شیان ھەنە، لێ ئەم نەشیاینە مفای ژ شیانێن وان وەربگرین، چونکی ئەو دەلیڤە بۆ سینەماکاران پەیدا نەبوویە، یا وەکو وان بڤێت کار بکەن ، ژبەرکو پارە و بۆدجێ پێدڤی لبەر دەستێ وان نینە تێدا کار بکەن، ھەروەسا ل سالێن ھەشتێ و نۆتان پتر خەلکێ حەز ل سەر بەرێخوەدانا فلمان ھەبوو، لێ نوکە خەلک ب عەیب دزانیت بچنە دناڤا ھۆلێن سینەمایێ دا و تەماشەی فلمان بکەن، لێ ھێشتا تەماشەکرنا فلمان ل کوردستانێ نەبوویە کەلتۆر و خەلک زوو ب زوو ناچنە پێش فلمێن سینەمایی، دیسان ب بازارکرنا فلمێن سینەمایی ژی ل کوردستانێ نینە، گەلەک جاران دەرھێنەرەک دێ فلمەکێ چێکەت و ئەو مەزاختنا وی ل وی فلمی کری، ئەو پارە نەگەھشتییە وی، لێ ئەڤ چەندە ل جیھانێ بەرۆڤاژی یە.
