ئەمریکا دێ پێگەھێ خوە ل سووریێ ب ھێزتر کەت
ئەڤرۆ:
ل گۆر راپۆرتەکا ئاژانسا سپۆتینگ نیوز یا روسی جۆ بایدن دڤێت پێگەھێ ئەمریکا ل رۆژھەلاتا ناڤین ب تایبەتی ژی ل سووریێ ب ھێزتر بکەت و دھێتە چاڤەرێکرن کو ئەمریکا ھێزێن زێدەتر ژی رەوانەی رۆژئاڤایێ کوردستانێ و باکورێ سووریێ بکەت، چونکو جۆ بایدن بەرۆڤاژی سەردەمێ ترامپی دڤێت ل ھەمبەر ھەبوونا تورکیا و روسیا پێگەھێ ئەمریکا ل سووریێ ب ھێزتر بکەت و ئەو یەک ب دلێ روسیا، تورکیا و ھەتا ئیرانێ ژی نینە، چونکو بایدن کار ل سەر ب ھێزکرنا پێگەھێ ئەمریکا ل رۆژھەلاتا ناڤین دکەت و ئەمریکا نەڤێت ھێزێن خوە ژ عیراقێ و ئەفغانستانێ ژی ڤەکێشیت.
چاڤدێرێن سیاسی ژی دیار دکەن کو ئیدارا نوو یا ئەمریکا ب سەرۆکاتیا جۆ بایدن دێ گرنگیەکا مەزن دەتە بابەتێ سووریێ و ئەو یەک د بەرژەوەندیا کوردێن سووریێ دایە، چونکو بایدن دڤێت سنورەکێ بۆ تورکیا و روسیا ل سووریێ دانێت و ژ بەر ھندێ ژی نھا ئەمریکا کار ل سەر ب ھێزکرنا پێگەھێ خوە ل باکورێ سووریێ دکەت.
ئەو یەک د دەمەکێ دایە کو حەفتیا بۆری کاروانەکێ مەزن یێ سەربازێن ئەمریکا ل گەل چەکێن گران گەھشتنە رۆژئاڤایێ کوردستانێ و ل گۆر باوەریا چاڤدێرێن سیاسی دێ ئەمریکا چەندین بنگەھێن نوو یێن سەربازی ژی ل رۆژئاڤایێ کوردستانێ و باکورێ سووریێ ئاڤا کەت.
