دەلیڤا کاری بۆ ھژمارەکا کچ و ژنان دیتیە
ئەڤرۆ، زنار تۆڤی:
نیدار نەوزاد، کچەکە، کارگێریا جھەکێ چێکرنا خوارنێن کوردەواری ل دھۆکێ دکەت، د دیدارەکێ دا بۆ رۆژناما ئەڤرۆ دیارکر، بەری پتر ژ سالەکێ دو ژنان کارگەھەک بۆ چێکرنا خوارنێن کوردەواری ل دھۆکێ ڤەکر، مەرەما وان پێ ئەو بوو ئەو ھندەک کچ و ژنان بدەنە کاری، ب تایبەت ئەوێن حەزا چێکرنا خوارنێن کوردەواری ھەین و نوکە نێزیکی بیست کچ و ژنان لێ کار دکەن، رۆژانە پتری بیست جۆرێن خوارنێن کوردەواری و شریناھیان و کادان ل دووف داخوازیا خەلکی چێدکەن و ب رێیا دیلیڤەری وان خوارنان بەلاڤ دکەن.
ناڤھاتییێ گۆت: رۆژانە داخوازیەکا باش ل سەر وان خوارنان ھەیە و داخوازی زێدە دبن، ئەم ژی کارمەندێن خوە زێدە دکەین، ژ پێخەمەت ھندەک کچێن دی ژی بۆ خوە کار بکەن، ھەروەسا ئەم خوارنێ بۆ خوارنگەھان و بۆ دەرڤەی وەلاتی ژی ڤرێدکەین، و خەلکێ مە پتر حەز ژ خوارنا کێپاریا و ئیپراخان دکەن، ھەروەسا مە ل بەرە کارگەھا خوە بەرفرەھتر لێ بکەین، دا بشێین دەلیڤا کاری بۆ ھندەک کچ و ژنێن دی ژی پەیدا بکەین، و رۆژانە ئەم کارێ خوە ب رێیا سۆشیال میدیایێ بەلاڤ دکەین.
