زیاد ئەحمەد: رژدین ئەڤرۆ زاخۆ بەرە ب سەرکەفتنێ ببەین
ئەڤرۆ،
دھێتە چاڤەڕێکرن ئەڤرۆ شەش یاریێن دی ژ ھەڤڕکیێن گەڕا ١٨ێ یا خولا پلا نایابا عیراقێ یا تەپاپیێ بھێنە ئەنجامدان، یانا زاخۆ نوونەرا پارێزگەھێ د گرنگترین یاری دا دێ بیتە مێڤانا یانا نەجەف کو دھێتە ھژمارتن تاقیکرنەکا دی یا بھێز بوو کوڕێن خابیری.
تیما یانا زاخۆ دێ ب زاخەکا بلند ھێتە دناڤ یاریێ دا تایبەت پشتی ل حەفتیا بوری سەرکەفتنەکا باش لسەر مێڤانا خوە یانا سەماوە تۆمارکری ب دو گۆلان بیێ بەرامبەر و ٢٧ خالان جھێ خوە ل رێزا شەشێ پاراستی، ھەمبەری وێ یانا نەجەف ھەڤڕکا کوڕێن خابیری یە و رێزا پێنچێ دھێت ب ٢٩ خالان و سەرکەفتن دڤێ یاریێ دا دێ بەرە ب رێزێن باشتر چیت.
لدور دووماھی بەرھەڤیێن وان زیاد ئەحمەد کاپتن و گۆلکەرێ یانا زاخۆ بۆ رۆژناما ئەڤرۆ گوت: ئەڤ یاریە بۆ مە گەلەک گرنگە و بدەستڤەئینانا ئەنجامەکێ باش دێ بەرە ب رێزێن باشتر چین و ژ ھەڤڕکا خوە نەجەف دوورکەڤین، ھەموو یاریزان بەرھەڤن و رژدن بۆ سەرکەفتنێ سەرباری ئەرکێ مە ب سانەھی نابیت لێ لدیڤ نەخشێ کادرێ راھێنانێ دێ سەرەدەریێ ل گەل کاودانێن یاریێ کەین پێخەمەت بدەستڤەئینانا ئارمانجا خوە ئەوژی سێ خالان، ھەرچەندە یانا زاخۆ د کاودانەکێ ھەستیار دا دەرباز دبیت لەورا ھیڤییا مە ئەوە جھێن پەیوەندیدار و پارێزگارێ دھۆکێ خوە ل ڤێ یانێ بکەنە خودان ژبەرکو نوونەرا ئێکانەیە یا پارێزگەھێ د خولا عیراقێ دا.
