ئەو تشتێ د خەیالا وێ دا دروست دبیت دکەتە کەڤال
ئەڤرۆ، زنار تۆڤی:
پەیکەرساز و شێوەکار سولتان برھان مەحمود، خەلکا باژێرێ سلێمانیێ یە و نوکە ژی ل ھەمان باژێر دژیت، ھەروەسا نوکە قوتابیە ل قووناغا سییێ ل پشکا پەیکەرسازییێ ل پەیمانگەھا ھونەرێن جوان ل سلێمانیێ، د دیدارەکێ دا بۆ رۆژناما ئەڤرۆ گۆت: ھەر ل زارۆکاتیا خوە من حەز ل سەر ھونەرێ شێوەکاری ھەبوو، ئەڤ حەزە ل گەل من مەزن بوویە، ل دەمێ من ل قووناغا سەرەتایی دخواند، مامۆستایێن من یێن وانا ھونەری گەلەک پشتەڤانی ل من دکر، دیسان پشتی ھاتیمە پەیمانگەھا ھونەرێن جوان ژی، بۆ دەمێ دو سالان ب رێیا گرۆپێ “ھونەری کوردستان”، ئەز شیام کار و کەڤالێن خوە نیشا ھونەرمەندان و ھونەردوستان بدەم و نوکە ژی ئەز ئەنداما دەستەیا کارگێری مە د وی گرۆپی دا. ناڤھاتیێ گۆت ژی: ھەتا نوکە من پشکداری د حەفت پێشانگەھێن ھەڤپشک دا کرییە ل سلێمانیێ، دیسان من پشکداری د پێشانگەھەکا ئۆنلاین دا کریە ل وەلاتێ تورکیا و چەندێن پێشانگەھێن دیتر ل وەلاتێن عەرەبی، ھەروەسا کەڤالێن من نە د تایبەتن ب بابەتەکێ ھەمیشەیی ڤە، ئەو تشتێ سەرنجا من رادکێشیت و ئەوێ د خەیالا من دا دروست دبیت دکەمە کەڤال، دیسان د نوکە دا گرنگییەکا باش ب ھونەری دھێتە دان، ھەروەسا نوکە ئاستێ فرۆشتنا کەڤالان یێ باشە، دێ ھنگێ باشتر لێ ھێت، دەمێ رەوشا ئابووری یا وەلاتێ مە باشتر لێ بھێت.
سولتانێ گۆت: ئەز ھەردەم مژوولی چێکرنا کەلاڤا مە، ھەر چەندە ئەز پشکا پەیکەرسازیێ دخوینم، جاران پەیکەران ژی دروست دکەم، د نوکە دا کچ ژی شییاینە رۆلەکێ باش د ھەموو وارێن ھونەری دا ب گێرن، ب دیتنا من بەھرە و شێوەکاریێ چو پەیوەندی ب رەگەزی ڤە نینە، دیسان ئەز ب ھیڤی مە، ل قووناغێن داھاتی دا دێ شێم خزمەتەکا باش د ڤی واری دا ئەنجام دەم.
