شێوەکارەک: وەزارەتا رەوشەنبیری و لاوان بۆ ھونەرمەندان گەلەک یا کێمتەرخەمە
ئەڤرۆ، رەمەزان ھەرنی:
ھونەرمەندێ شێوەکار حسێن رەشید، د دیدارەکێ دا بۆ رۆژناما ئەڤرۆ گۆت: ھەتا رادەیەکێ گەلەک باش شیامە ئەو پەیاما من ھەیی ب رێیا کارێن ھونەری بگەھینم ب تایبەت ب رێیا ڤەکرنا پێشانگەھا و تۆرێن جڤاکی، ب دیتنا من نابیت کارێ ھونەرمەندێن کوردستانێ ب تنێ ل ناڤخۆیا کوردستانێ بینەر ھەبیت بەری نوکە وەسا بوو، بەلێ نوکە ژبەر تەکنەلۆژیایێ جیھان ھاتیە گوھۆڕین ب تایبەت ژ بەر تۆرێن جڤاکی کارێن ھونەری بینەرەکێ مەزن ل جیھانی ھەنە کو ئەڤە بوویە دەرگەھەکێ باش بۆ گەھاندنا پەیاما ھونەرمەندێن کورد ژبلی ناڤخۆیا کوردستانێ بۆ دەرڤەی کوردستانێ ژی.
ناڤھاتی گوت ژی: گەلەک گرنگ و پێدڤیە کارێ ھونەرمەندێن کورد ب جیھانێ بھێنە ناسین، ژ بەرکو ب رێیا بەلاڤبوونا کارێن ھونەری یێن ھونەرمەندێن کورد دێ جیھان ھەموو تێکەلی و شارەزایی دگەل داب و نەریتێن کوردی دروستکەن، لەوڕا گەلەک یا گرنگە ھونەرێ کوردی ب جیھانێ بھێتە ناسین، بەلێ وەزارەتا رەوشەنبیری و لاوان یا حکومەتا ھەرێما کوردستانێ گەلەک یا کێمتەرخەمە بۆ ھونەرمەندان ب گشتی و شێوەکاران ب تایبەتی.
ل دووماھیێ حسێنی گۆت: کارێن من پەیکەر و کەڤالن بابەتێن پۆرترێتو تەعبیرین و ب ستایلێ سۆپەر ریالیزم کار دکەم، ل ھەموو بوارەکێ دا کاردکەم گشتی بیت یان کەسی، نوکە ژ بەر ڤی رەوشا جیھان ب گشتی و کوردستان ب تایبەتی تێدا دەرباز دبیت چو کارێن ھونەری ل بەر دەستێ من نینن، بەلێ بەرھەڤیا دکەم د دەلیڤەکا باش دا پێشانگەھەکێ ڤەکەم.
