پێنچ یارێزانێن پارێزگەھێ پشکداری قارەمانیا سۆپەرا عیراقێ بن
ئەڤرۆ،
چاڤەرێ یە دووماھیا ڤێ حەفتیێ پێنچ یاریزانێن پارێزگەھا دھۆکێ پشکداری قارەمانیا سۆپەرا عیراقێ بۆ یاریا کیک بۆکسینگێ بن، ئێک ژ بھێزترین قارەمانیێن وەرزێ نوو ژبۆ ژێگرتنا باشترینان بۆ ھەلبژارتیێ عیراقێ، ئەوا دێ ھەڤڕکیێن وێ ل باژێرێ سلێمانیێ ب پشکداریا قارەمانێن دەڤەرا باکور و باشۆر و یاریزانێن ھەلبژارتیێ عیراقێ ھێنە ئەنجامدان.
سالح کەکو راھێنەرێ ھەلبژارتیێ پارێزگەھێ و یانا دھۆکێ بۆ رۆژناما ئەڤرۆ گوت: ژ پارێزگەھا دھۆکێ پێنچ یاریزان بەرھەڤیان بۆ قارەمانیا سۆپەرا عیراقێ دکەن کو پێکھاتینە ژ عەلی عزەت، دلۆڤان جەمال،حەسەن مستەفا، وەلید محەمەد و زێرەڤان سالم ژ یانێن، دھۆک، زاخۆ و ئامێدیێ نە و ھەڤڕکی لسەر دوازدە کێشان و دێ لدیڤ سێ سیستەمێن نێڤدەولەتی بیت ئەوژی، full contact، K١، semi contact، سەرکەفتیێن ئێکێ وەکو یاریزانێ سەرەکی و یێن دوێ یەدەک بۆ ھەلبژارتیێ عیراقێ ھێنە ژێگرتن.
ژلایەکێ دیڤە ناڤھاتی دیارکر کو یاریزانێن پارێزگەھێ بەردەوامن لسەر راھێنانێن خوە، سەرباری دێ ھەڤڕکیەکا بھێز و تاقیکرنەکا بزەحمەت بیت بۆ نوونەرێن پارێزگەھێ، لێ گەشبینم دێ باشترین ئاست نیشاندەن ب ھیڤیا وێ یەکێ جھێن خوە دناڤ رێزێن ھەلبژارتیێ عیراقێ دا بکەن پێخەمەت پشکداری قارەمانیێن دەولەتی بن.
