سەرسنک بنەکوک و ئێکەم ھاڤینگەھە ل سەر ئاستێ عیراقێ
سەرسنک، مەحمود نھێلی
رێڤەبەرێ گەشت و گوزارا ئامێدیێ دیار کر، ٩٠ سالان بەری نوکە سەرسنکی وەک بنەکوکا ھاڤینگەھێن عیراقێ ھاتیە نیاسین و ئێکەم جار ھاڤینگەھەکا مللی بوویە کو نوکە دبێژنێ کەرتێ تایبەت، لێ مخابن نوکە ئەو ناسناڤێ خوە ژ دەست دایە.
نەزیف موحەمەد عەلی، رێڤەبەرێ گەشت و گوزارا ئامێدیێ بۆ رۆژناما ئەڤرۆ دیار کر، ل دووڤ بەلگە و دیکومێنتا و گوڤارێن عەرەبی و عیراقی سەرسنکێ ئێکەم ھاڤینگەە بوویە ل سەر ئاستێ عیراقێ، کو ژبلی عیراقیان گەشتیارێن دەرڤە و وەلاتێن عەرەبی ژی قەست دکرنێ، لێ نوکە ئەو ناسناڤێ خوە ژ دەست دایە و پێدڤیە د بیاڤی دا پتر کار بھێتە کرن بو ڤەگەراندنا ڤی ناسناڤی بۆ ھاڤینگەھێ سەرسنکێ.
ئاشکرا کر، گەشت و گوزارا سەرسنکێ د سێ قوناغا دا دەرباز بوویە، و گۆت : پشتی جادە ل سالا ١٩٣١ گەھشتیە دەڤەرێ بۆ ئێکەم جار سەرسنک ل سالا ١٩٣٣ وەک سەیرانگەە و ھاڤینگەھەکا ئەھلی ھاتیە نیاسین و ل سالا ١٩٣٨ تا سالا ١٩٥٢ وەک ھاڤینگەھەکا پادشایی (مەلەکی) زێدەباری ھاڤینگەھەکا مللی ھاتیە نیساین و ل سالا ١٩٥٢ تا نوکە وەک ھاڤینگەھەکا حکومی بوویە.
ناڤھاتی خویاکر، ھەبوونا کوچکا پاشای و ئوتێلا بەری و مەلەڤانگەھا ئولومپیاتا و گوندێ فرەنسی و ئوتێلا ئیتالی و (شلێر) و خارنگەھا جاھز (ئیتالی) و چەندین بنگەھێن دی یێن گەشتیاری، سەرسنک تا سالا ١٩٩٠ ێ ل چەرخێ بوری ژی ھاڤینگەھا ئێکێ بوویە ل سەر ئاستێ عیراقێ ھەموویێ و دووڤ دا ھاڤینگەھا شەقلاوا دھات.
ھیڤی ژی خواستن، پتر گرنگی ب کەرتێ گەشتیاری یێ دەڤەرێ بھێتە دان ژ بەر کو دەڤەرا وان ژھەموو لایەکی گەلەک یا گونجایە دبوارێ گەشت و گەشت و گوزاری ڤە.
ناڤھاتی دیار ژی کر، ھەکە نوکە ژی ئەڤ پرۆژەیێن د رۆژەڤێ دا ل سنورێ ناحیا سەرسنکی بھێنە بجھئینان وەک چێکرنا تەلەفریکێ و گەھاندنا جادەیان بۆ وان جھێن گەشتیاری ھەروەسا نووژەنکرنا جھـ و گوندێن گەشتیاری یێن سنورێ ناحیا سەرسنکی، ھەروەسا پتر گرنگی ب کەرتێ گەشت و گوزاری بھێتە دبیت جارەکا ھاڤینگەھا سەرسنکی ناڤێ خوە یێ بەری ڤەگەرینت و سالانە ھەژمارەکا زۆرا گەشتیاران قەست بکەنێ چونکە ژ ھەموو لایەکی ڤە سەرسنک یا گونجایە بۆ گەشت و گوزاری.
