ئەحمەد کوچەر: گوھۆرین پەیدابووینە و دێ رێکارێن تۆند ھەبن
ئەڤرۆ،
د داخویانیەکێ دا ئەندامێ ئێکەتیا تەپاپیێ یا عیراقێ دیارکر کو پشتی بەلاڤبوونا ڤایرۆسێ کورۆنایێ ل چەند باژێرێن عیراقێ سەرھلدایی، نەچاربووین بڕیارا گۆھرینێ د ژڤانێ یاریێن خولا پلا نایاب و راوەستیانا پلا ئێک و چەند چالاکیان بکەین و دیسا ھندەک رێکارێن تۆند لسەر تیمێن پشکدار بھێتەکرن پێخەمەت کۆنترولکرنا ڤێ پەژیا جیھانی.
زێدەتر ئەحمەد کۆچەر بۆ رۆژناما ئەڤرۆ گوت: لژنا بەرھنگاربوونا دژی ڤایرۆسێ کورۆنایێ داخواز ژ مە کربوو ھندەک پێنگاڤا پاڤێژین پێخەمەت خوە پاراستن ژ ڤێ ئێشێ، لەورا پشتی چەندین کۆمبوونێن جودا بڕیار ھاتەدان خولا پلا نایاب بەردەوام بیت کو بتنێ بۆ رۆژێن سێ شەمبی و چارشەمبیا بھێتە ئەنجامدان لێ ب رێکارێن تۆند ژوانا دڤێت ھەموو یانە پشکنینێن ڤایرۆسێ کورۆنایێ یێ شاندێ تیمێ ل گەل بن کو ٢٤ دەمژمێرا نە بوریت و ھەر یانەک بھێتە باژێرەکێ دی بتنێ مافێ ھەیی بۆ دەمێ راھێنانا و یاریێ ژ ئۆتێلێ دەرکەڤیت، ھەروەسا دناڤ یاریگەھێ دا ھەموو یاریزان ماسکێ ب کاربینن و چو رەنگان نابیت جەماوەر بەرھەڤی یاریان بیت.
ژلایەکێ دیڤە ناڤھاتی گوت: بڕیارا راوەستاندنا ڤاڤارتنێن دەربازبوونێ بۆ پلا ئێکا عیراقێ و فۆتسالێ و چەند چالاکیێن دی ھاتیەدان ھەتا دەمەکێ نەدیار، ئەڤ پێنگاڤە ب رازیبوونا وەزیرێ وەرزش و لاوان ھاتیەکرن، لەورا چاڤەڕێ یە ئەڤرۆ لژنا بەریکانا دەست ب دانانا خشتەکێ نوو یێ یاریان و ھندەک رێنومایا بەلاڤبکەن ب ھیڤییا وێ یەکێ ھەموو یانە پێگیریێ پێ بکەن.
