یاریگەھا دھۆکێ دێ مێڤانداریا دو یاریێن ھەولێرێ کەت
ئەڤرۆ،
ئێکەتیا تەپاپیێ یا عیراقێ رازی بوو لسەر داخوازیا یانا ھەولێر ژبۆ ڤەگۆھاستنا دو یاریێن وێ یێن گەڕا ئێکێ و سیێ ژ قۆناغا دوێ یا خولا پلا نایاب، دەرئەنجامێ نووژەنکرنا یاریگەھا خوە شەھید فرانسۆ حەریری پێخەمەت بەرھەڤیان بۆ پێشوازیا پاپایێ ڤاتیکانێ ئەوێ دێ ل سەر داخوازیا حکومەتا ھەرێمێ ھێتە کوردستانێ کو دێ رێورەسمێن پەیڤا وی ل یاریگەھا شەھید فرانسۆ حەریری بن.
کاروان تاھر سلێمان رێڤەبەرێ یاریگەھا یانا دھۆک بۆ رۆژناما ئەڤرۆ گوت: لسەر داخوازا یانا ھەولێر ژبۆ ئەنجامدانا دو یاریان ل ناڤ یاریگەھا مە کارگێریا یانێ رازیبوو و دیسا ئێکەتیا تەپاپیێ یا عیراقێ ژی رازیبوونا خوە دیارکریە، ب فەرمی یاریگەھا یانا دھۆک مێڤانداریا دو یاریێن بھێت یێن یانا ھەولێرا پایتەخت ژ قۆناغا دوێ یا پلا نایابا عیراقێ ل گەل یانا بەغدا ئەوا دێ ل رۆژا چارشەمبیا بھێت ئەنجامبدەت و دیسا یاریا ل گەل یانا ئەلقاسم کو پشتی دو حەفتیان ئانکۆ گەڕا سیێ بکەت.
ژلایەکێ دیڤە ناڤھاتی دیارکر کو دوھی لژنا دیڤچوونێ ژ ئێکەتیا تەپاپیێ یا عیراقێ سەرەدانا یاریگەھا یانا دھۆک کربوو ژبۆ ڤەدیتنا یاریگەھێ و وەرگرتنا پێزانینان لسەر دووماھی بەرھەڤیێن وێ بۆ خولا پلا ئێکا عیراقێ و گوت: یاریگەھا یانا دھۆک ھەر ژ سالا ٢٠١١ ژلایێ ئێکەتیا تەپاپێی یا ئاسیا و نێڤدەولەتی ڤە ھاتیە پەسەندکرن وەکو ئێک ژ یاریگەھێن باوەرپێکری لسەر ئاستێ عیراقێ و ئاسیا ژبەر ھەبوونا ساخلەت و مەرجێن پێدڤی یێن یاریگەھێن نێڤدەولەتی کو دشێت ھەر یاریەکا دەولەتی مێڤانبکەت.
