حاجی دوسکی: نەبوونا لژنەکا ئەکادیمیێن تەپاپیێ بەرەلایی پەیداکریە
ئەڤرۆ،
د داخویانیەکێ دا نوونەرێ ئەکادیمیێن پارێزگەھا دھۆکێ بۆ رۆژناما ئەڤرۆ دیارکر کو نەبوونا لژنەکا تایبەت ب ئەکادیمیێن پارێزگەھێ بوویە ئەگەر بەرەلایی پەیدابیت و ھیڤی خواست ژ ئیدارا پارێزگەھێ، رێڤەبەریا وەرزشی و لژنا ئۆلۆمپی دیڤچوونا ڤی بابەتی بکەن و چارەسەریێ بوو پەیدابکەن ژبەرکو ھەتا دەە ئەکادیمی ھەنە بشێوێ زانستی کارێ خوە دکەن.
زێدەتر حاجی دوسکی گوت: مە ل پارێزگەھێ ژمارەکا باش یا ئەکادیمیێن تەپاپیێ ھەنە وشیاینە د ماوێ دو سالێن بوری دا یاریزانێن باش لسەر ئاستێ تازەپێگەھشتیان بۆ یانێن دھۆک، زاخۆ، سێمێل و گارە پەیدابکەن، لێ مخابن بێی بەھرنەبووینە ژ ئاستەنگان وەکو نە پووتەدان ژلایێ جیھەتێن پەیوەندیدار ژوانا ئێکەتیا تەپاپیێ یا کوردستانێ کو رێگری لێ ھاتیەکرن، ئەڤچەندە نەبوویە ئەگەر کارێ خوە راوەستینن و ھەتا نوکە ب سەدان یاریزان لبن دەستێ راھێنەرێن شارەزا و پسپۆر راھێنانان دکەن کو لدیڤ سیستەمێ پەروەردەیی و زانستی برێڤەدبن.
ژلایەکێ دیڤە ناڤھاتی گوت: ئەکادیمیێن پارێزگەھێ پێدڤی ب ھەبوونا لژنەکێ نە کو رێکخستنا کارێ وان بھێتەکرن ژبۆ پاشەرۆژا گەش یا وەرزشا پارێزگەھا دھۆکێ و ئەڤ لژنە دێ شێت رێکخستنێ ئێخیتە د کرێیا ئەکادیمیا و دیارکرنا راھێنەرێ شارەزا و خودان باوەرنامە و پشکداریکرنا قارەمانیان یا گرنگتر دێ ئەکادیمی زێدەتر رۆلێ خوە بینت و زانیت چەوا کارێ خوە بکەت، لەورا ھیڤیا مە ئەوە ژ پارێزگارێ دھۆکێ و ھەر لایەنەکێ پەیوەندیدار ب رژدی کار لسەر ڤی بابەتی بکەن ژبۆ خزمەتا وەرزشا پارێزگەھێ و پاشەرۆژەکا گەش یا سەدەھان زاروویێن خودان شیان د یاریا تەپاپێی دا.
