پەیوەندیێن روسیا و ئێکەتیا ئورۆپا ئالۆز دبن
ئەڤرۆ:
وەزیرێن دەرڤە یێن وەلاتێن ئەندامێن ئێکەتیا ئورۆپا کۆمبوون و پشتی کۆمبوونێ راگەھاندن کو دڤێت روسیا رێزێ ل دیموکراسیێ و نێرینێن جودا بگریت، دەستەسەرکرنا سەرکردێ ئۆپۆزسیۆنێ و سزادانا وی ب چو رەنگەکێ ژ ئالیێ ئورۆپا ڤە ناھێتە قەبوولکرن و ژ بەر ھندێ ژی وەلاتێن ئێکەتیا ئورۆپا بریار داینە کو دەست ب سزادانا روسیا بکەن و بەرپرسێن روسیا نەشێن سەرەدانا ئورۆپا بکەن و ھەروەسا دێ حسابێن بەنکی یێن گەلەک بەرپرسێن روسیا ل وەلاتێن ئورۆپا ژی ھێنە داخستن.
پشتی ھەلویستی وەزیرێن دەرڤە یێن ئێکەتیا ئورۆپا، سیرگێی لاڤرۆڤ وەزیرێ دەرڤە یێ روسیا راگەھاند کو بریارا دەستەسەرکرنا ناڤالنی ژ ئالیێ دادگەھێ ڤە ھاتیە دان و وەکو حوکمەت وان دەستێوەردان د بریارا دادگەھێ دا نەکرینە، لێ وەلاتێن ئورۆپا دخوازن بابەتێ ناڤالنی ل دژی روسیا بکار بینن و گۆت: (ئەمریکا و وەلاتێن ئورۆپا ب رەنگەکێ ئاشکرا داخواز ژ وەلاتیێن روسیا کرن کو ل دژی حوکمەتا خوە دەست ب خوەنیشادانان بکەن ئەو یەک بۆ ئەگەرێ ھندێ کو رەوشا ناڤخوەیی یا وەلاتێ مە ئالۆز بیت، بەری نھا ژی مە ھۆشداری دابوو ئەمریکا و وەلاتێن ئێکەتیا ئورۆپا کو وان چو ماف نینن دەستێوەردانێ د کاروبارێن ناڤخوەیی یێن روسیا دا بکەن).
وەزیرێ دەرڤە یێ روسیا ئەو یەک ژی دیار کر کو ھەکە وەلاتێن ئورۆپا دەست ب سزادانا روسیا بکەن وی دەمی روسیا ژی دشێت ھەموو پەیوەندیێن خوە ل گەل ئورۆپا بدەتە راگرتن، چونکو مافێ چو وەلاتەکێ نینە دەستێوەردانێ د کاروبارێن ناڤخوەیی یێ روسیا دا بکەت و دڤێت ھەموو وەلات رێزێ ل سەروەریا روسیا بگرن، مخابن ھندەک وەلاتێن ئورۆپا بۆ بەرژەوەندیێن خوە بابەتێ ناڤالنی ل دژی روسیا بکار دئینن.
