وەزیرێ دەرڤە یێ ئەمریکا: سیاسەتا ترامپی ل ھەمبەر ئیرانێ یا سەرکەفتی نەبوو
ئەڤرۆ:
ئانتۆنی بلینکن وەزیرێ دەرڤە یێ ئەمریکا راگەھاند کو سزایێن بەری نھا ل سەر ئیرانێ ھاتینە سەپاندن دێ وەکو خوە بەردەوام بن و ئەمریکا ب چو رەنگەکێ سزایێن ل سەر ئیرانێ سڤک ناکەت و دێ ب رێیا ھەڤپەیمانێن خوە ل ئورۆپا و رۆژھەلاتا ناڤین فشارێن دبلۆماسی ل سەر ئیرانێ زێدەتر لێ کەت و گۆت: (دڤێت ئیران ب ھەموو رەنگەکێ پیتاندنا یۆرانیۆمێ بدەتە راگرتن و ھەموو خالێن رێککەفتنا ئەتۆمی ژی بجە بینیت، نابیت ل ژێر ناڤێ رێککەفتنا ئەتۆمی ئیران دەستێوەردانێ د کاروبارێن وەلاتێن رۆژھەلاتا ناڤین دا بکەت و ھەروەسا ھاریکاریا گرۆپێن تیرۆرستی بکەت ئەو یەک ب چو رەنگەکێ ناھێتە قەبوولکرن).
وەزیرێ دەرڤە یێ ئەمریکا ئەو یەک ژی دیار کر کو سیاسەتا فشارێ یا ئیدارا ترامپی ل ھەمبەر ئیرانێ یا سەرکەفتی نەبوویە و ئیدارا نوو یا ئەمریکا دڤێت ل گەل ھەڤپەیمانێن خوە ب رێیێن دبلۆماسی فشارێن ل سەر ئیرانێ زێدەتر لێ بکەت دا تەھران نەچار بیت دەستان ژ سیاسەتا خوە یا بۆ دروستکرنا چەکێن ئەتۆمی بەردەت و گۆت: (ئەمریکا ب چو رەنگەکێ رێ نادەت ئیران ببیتە خوەدان چەکێن ئەتۆمی، ژ بەر ھندێ ژی سزایێن کو بەری نھا ل سەر ئیرانێ ھاتینە سەپاندن دێ وەکو خوە مینن و ناھێنە راکرن).
ناڤھاتی ئەو یەک ژی دیار کر کو ھەر رێککەفتنەکا نوو ل گەل ئیرانێ بھێتە کرن دێ بۆ بەرژەوەندیێن ئەمریکا و ھەڤپەیمانێن وێ بیت و ھەموو بزاڤێن ئەمریکا ژی بۆ ھندێ نە دا پێگەھێ ئیرانێ ل رۆژھەلاتێ ناڤین لاواز بکەین و رێ نەدەین ئیران پتر دەستێوەردانێ د کاروبارێن وەلاتێن رۆژھەلاتا ناڤین دا بکەت و گۆت: (ھێزێن سەر ب ئیرانێ ل عیراقێ و دەڤەرێن دی ھێرشی ھێزێن ئەمریکا و ھەڤپەیمانێن وێ کرینە، ھەکە ئیران ل سەر ھەلویستێ خوە یێ توند بەردەوام بیت ئەمریکا دێ ب توندی بەرسڤا ھەموو ھێرشێن ئیرانێ و ھێزێن سەر ب وێ ڤە دەت، چونکو پاراستنا ھێزێن ئەمریکا و ھەڤپەیمانێن وێ بۆ مە ھێلا سورە).
